90 کی دہائی کے کھلاڑیوں سے متعلق بیان، حفیظ نے وضاحت دیدی

میرا بیان محض آئی سی سی ٹورنامنٹ جیتنے کے حوالے سے تھا، جسے غلط انداز میں پیش کیا گیا، سابق کرکٹر

ذیشان مہتاب منگل 18 مارچ 2025 15:25

90 کی دہائی کے کھلاڑیوں سے متعلق بیان، حفیظ نے وضاحت دیدی

لاہور (اردو پوائنٹ تازہ ترین اخبار ۔ 18 مارچ 2025ء ) قومی ٹیم کے سابق کپتان و ٹیم ڈائریکٹر محمد حفیظ نے 90 کی دہائی کے کھلاڑیوں سے متعلق دیے گئے اپنے بیان پر لب کشائی کردی۔

44 سالہ سابق کرکٹر نے سوشل میڈیا پر وضاحت جاری کرتے ہوئے کہا کہ ’بعض میڈیا اداروں نے غلط طریقے سے خبر کو پیش کرنے کی کوشش کی، میرا مقصد کسی پر ذاتی حملہ نہیں تھا۔

انہوں نے کہا کہ میرا بیان محض 90 کے دہائی میں آئی سی سی ٹورنامنٹ جیتنے کے حوالے سے تھا، اسکے علاوہ اور کچھ نہیں جسے اس انداز میں پیش کیا گیا جیسے کسی انفرادی شخص کو تنقید کا نشانہ بنایا ہو۔ سابق کرکٹر نے واضح کیا کہ انکا بیان 92 کے بعد اس دور میں پاکستان کے عظیم کھلاڑی اپنی تمام تر کرکٹ ٹیلنٹ کے باوجود 1996ء، 1999ء اور 2003ء میں آئی سی سی ایونٹس نہیں جیت سکا تھا۔

(جاری ہے)

قبل ازیں محمد حفیظ نے آئی سی سی چیمپئنز ٹرافی میں پاکستانی ٹیم کی بدترین کارکردگی پر گفتگو کرتے ہوئے نائنٹیز کے میگا سپر اسٹارز کا ذکر کیا تھا۔ ان کا کہنا تھا کہ نائنٹیز کی ٹیم نے پاکستان کئی میگا سٹارز دیے تاہم انہوں نے ہمیں کوئی آئی سی سی ایونٹ نہیں جتوایا، ورلڈ کپ 1996ء میں پرفارمنس خاطر خواہ نہیں رہی جب کہ 1999ء کے فائنل میں پہنچے اور شکست نے قوم کو جُھکا دیا۔

2008ء میں ایک ایسا واقعہ ہوگیا جس نے کرکٹ کو دور کردیا اور پھر اسی سال ہم نے 2009ء میں یونس خان کی کپتانی میں ٹی20 ورلڈکپ جیتا، قوم پھر کھڑی ہوگئی اور پھر 2017ء میں سرفراز کی قیادت میں چیمپئنز ٹرافی کی فتح نے ہمارا مورال بلند کیا۔ انہوں نے شعیب اختر سے سوال کیا تھا کہ بتائیں ہمارے نوجوان کرکٹرز کو 90 کی دہائی کے کرکٹرز کون سا ایونٹ جتوا کر دیا، وہ میگا سپر اسٹارز ضرور تھے کوئی ٹورنامنٹ نہیں دے سکے۔