Live Updates

سی ڈی اے انتظامیہ نے ادارے میں کام کرنے والے مسلم ملازمین کیلئے عیدالائونس کی منظوری دیدی ،نوٹیفیکیشن جاری

منگل 18 مارچ 2025 19:50

اسلام آباد(اُردو پوائنٹ اخبارتازہ ترین - این این آئی۔ 18 مارچ2025ء)سی ڈی اے مزدور یونین (سی بی ای) کے ساتھ طے شدہ معاہدے کے تحت سی ڈی اے انتظامیہ نے ادارے میں کام کرنے والے تمام مسلم ملازمین کے لیے عیدالائونس کی منظوری دے دی جسکا باقاعدہ نوٹیفیکیشن جاری کردیا گیا ہے۔

(جاری ہے)

نوٹیفیکیشن کے تحت مورخہ26مارچ بروزبدھ کو تمام ملازمین کے لیے ایک موجودہ بنیادی تنخواہ بطورعیدالاؤنس کی ادائیگی ماہانہ تنخواہ کے ساتھ کی جائے گی،اس موقع پر سی ڈی اے مزدور یونین کے جنرل سیکرٹری چوہدری محمد یٰسین نے چیئرمین سی ڈی اے چوہدری محمد علی رندھاوا،ممبر ایڈمنسٹریشن طلعت محمود،ممبرفنانس طاہرنعیم اختر اور سی ڈی اے انتظامیہ کا شکریہ ادا کرتے ہوئے کہا کہ ملک کے موجودہ مشکل معاشی حالات کے باوجود ایسے اقدامات سے یقینا سی ڈی اے کے غریب ملازمین کی خوشیوں میں اضافہ ہو گا اوروہ اس مہنگائی کے دور میں بہتر انداز میں اپنا مذہبی تہوار منا سکیں گے،انھوں نے کہا کہ اسلام آبادہائی کورٹ سے ملازمین کے پلاٹوںکا فیصلہ تحریری طورپر موصول ہو گیا ہے اور جس پر ہنگامی بنیادوں پر کام جاری ہے انشاء اللہ بہت جلد تمام ملازمین کو پلاٹوں کی قرعہ اندازی کروائی جائے گی ، انھوں نے تمام ملازمین سے گزارش کی کہ وہ صبر و تحمل کا مظاہرہ کریں اورکسی بھی بے بنیاداورجھوٹی افواہوں پر یقین نہ کریں ،اس موقع پر انھوں نے چیئرمین سی ڈی اے اور ممبرپلاننگ سے درخواست کی کہ وہ پلاٹوں کی الاٹمنٹ کے عمل کو تیزکریں تاکہ فی الفورقرعہ اندازی ہو سکے۔