وزیرداخلہ کا اوچ شریف میں شہید کیپٹن محمد آصف کی رہائش گاہ کا دورہ ، اہل خانہ سے ملاقات، تعزیت کا اظہار

ہفتہ 16 اگست 2025 20:00

اسلام آباد (اُردو پوائنٹ اخبارتازہ ترین - این این آئی۔ 16 اگست2025ء)وفاقی وزیرداخلہ محسن نقوی نے بہاولپور کے نواحی علاقے اوچ شریف میں شہید کیپٹن محمد آصف کی رہائش گاہ کا دورہ کیا ،وزیرداخلہ نے شہید کیپٹن محمد آصف کے والدین. بھائیوں اور دیگر اہل خانہ سے ملاقات کی، دلی ہمدردی و اظہار تعزیت کیا اور فاتحہ خوانی بھی کی۔ وزارت داخلہ کے مطابق وزیرداخلہ نے شہید کیپٹن محمد آصف کے سوگوار خاندان کے لئے صبر جمیل کی دعا کی اور شہید کیپٹن آصف کے والد، والدہ اور بھائیوں کے عزم اور حوصلے کو سراہا۔

انہوں نے شہید کیپٹن کی والدہ کو دلاسہ دیا اور ان کی ہمت کو سلام پیش کیا۔وزیرداخلہ محسن نے شہید کیپٹن محمد آصف کے 10 ماہ کے بیٹے محمد ارسلان سے شفقت کا اظہار کرتے ہوئے اسے گود میں بیٹھا کر پیار کیا۔

(جاری ہے)

اس موقع پر وزیر داخلہ نے شہید کیپٹن محمد آصف کو کم عمری میں ملنے والے میڈلز اور ایوارڈز بھی دیکھے۔ انہوں نے شہید کے اہل خانہ سے گفتگو کرتے ہوئے کہا کہ آپ جیسے با ہمت خاندان کا حوصلہ ہی قوم کی اصل قوت ہے، شہید کیپٹن محمد آصف جوانمردی کی لازوال مثال ہیں۔

محسن نقوی نے کہا کہ شہید کیپٹن محمد آصف کے والدین کو سلام پیش کرتا ہوں۔ انہوں نے کہا کہ شہید نے فتنہ الہندوستان کے دہشتگردوں کے خلاف بہادری سے لڑتے ہوئے جام شہادت نوش کیا،جواں سال سپوت نے زخمی ہونے کے باوجود شجاعت اور دلیری کے ساتھ بھارتی سپانسرڈ دہشتگردوں کو جہنم واصل کیا۔ محسن نقوی نے کہا کہ ہمارا ایمان ہے کہ شہید ہمیشہ زندہ رہتے ہیں اور کیپٹن محمد آصف بھی ہمیشہ ہمارے دلوں میں زندہ رہیں گے، پوری قوم شہداء کے خاندانوں کی عظمت کو سلیوٹ پیش کرتی ہے۔

وزیر داخلہ نے کہا کہ ہم شہید کیپٹن محمدآصف کے خاندان کیساتھ کھڑے ہیں اور ہمیشہ ساتھ کھڑے رہیں گے،شہداء کے خاندانوں کا خیال رکھنا ہماری قومی ذمہ داری ہے،شہداء کے خاندانوں کی لازوال قربانیاں ناقابل فراموش ہیں۔ واضح رہے کہ کیپٹن محمد آصف 12 اگست کو بلوچستان کے بسیمہ شہر میں بھارتی سپانسرڈ دہشتگردوں کے خلاف بہادری سے لڑتے ہوئے شہید ہو گئے تھے۔