یونیورسٹی آف سرگودھا میں ’’ ہم آہنگی کی طاقت ‘‘کے موضوع پر دو روزہ ورکشاپ کا انعقاد

سرگودھا (اُردو پوائنٹ اخبارتازہ ترین - اے پی پی۔ 19 مارچ2025ء) یونیورسٹی آف سرگودھا میں ہیومن ریسورس ڈویلپمنٹ سینٹر کے زیر اہتما م ’’موثر ہم آہنگی کی طاقت ‘‘کے موضوع پر دو روزہ ورکشاپ کا انعقاد کیا گیا ۔ جس میں تدریسی شعبہ جات کے کوآرڈینیٹرز نے شرکت کی۔ورکشاپ میں تدریسی ہم آہنگی، موثر ٹیم ورک اور اداراہ جاتی نظم و نسق پر تربیتی نشستوں کے انعقاد سے تعلیمی شعبہ جات کے کوآرڈینیٹرز کی انتظامی صلاحیتوں کو نکھارا گیا جبکہ تعلمی کو آرڈینٹیرز کے لیے یہ اس نوعیت کی دوسری ورکشاپ ہے۔

ورکشاپ کے پہلے سیشن میں ڈائریکٹر اکڈیمکس ڈاکٹر عظمیٰ شہزادی نے موثر تعلیمی انتظام کے موضوع پر گفتگو کی۔ انہوں نے تعلیمی امور کو منظم بنانے اور بین الشعبہ جاتی ہم آہنگی کو بہتر بنانے کے لیے مفید حکمت عملیاں پیش کیں۔

(جاری ہے)

ڈائریکٹر آئی ٹی اشتیاق احمد نے دفاتر میں جدید ٹیکنالوجی کے استعمال سے متعلق رہنمائی کی۔ انہوں نے اس بات پر زور دیا کہ ڈیجیٹل ٹولز اور پلیٹ فارمز کس طرح بین الشعبہ جاتی روابط کو مزید فعال بنا سکتے ہیں، انہوں نے یونیورسٹی کے لرننگ مینجمنٹ سسٹم کے حوالے سے بھی مفصل گفتگو کی۔

ڈائریکٹر کوالٹی انہانسمنٹ سیل ڈاکٹر عمران غفور نے معیاری تعلیم اور ادارہ جاتی مطابقت کے موضوع پر جامع بات کی۔ انہوں نے ادارہ جاتی معیار کو برقرار رکھنے اور شعبہ جاتی سرگرمیوں کو تعلیمی برتری کے مطابق ڈھالنے پر مفید نکات پیش کیے۔ڈائریکٹر اورک پروفیسر ڈاکٹر احمد رضا بلال نے مالیاتی نظم و نسق اور اورک کے ساتھ شعبہ جاتی ہم آہنگی کے موضوع پر بات کی۔

انہوں نے مالیاتی نگرانی کی اہمیت پر روشنی ڈالتے ہوئے تحقیق کے فروغ کے لیے اورک اور مختلف شعبہ جات کے درمیان تعاون کو بڑھانے پر زور دیا۔ورکشاپ کے اختتامی سیشن میں وائس چانسلر پروفیسر ڈاکٹر قیصر عباس نے بطور مہمان خصوصی شرکت کی۔ورکشاپ کی اختتامی تقریب خطاب کرتے پروفیسر ڈاکٹر قیصر عباس نے کہا کہ کسی بھی تعلیمی ادارے کی کامیابی مؤثر ہم آہنگی پر منحصر ہوتی ہے، اور شعبہ جاتی کوآرڈینیٹرز اس میں کلیدی کردار ادا کرتے ہیں۔

انہوں نے کہا کہ بہتر تعلیمی نظم و نسق، جدید ٹیکنالوجی کے مؤثر استعمال اور معیاری تعلیم کی فراہمی کے لیے بین الشعبہ جاتی تعاون ناگزیر ہے۔ انہوں نے تدریسی اور انتظامی عملے کی پیشہ ورانہ استعداد بڑھانے کے لیے ہیومن ریسورس ڈویلپمنٹ سنٹر کی کاوشوں کو سراہا جبکہ ورکشاپ کے شرکاء کی لگن اور سیکھنے کے جذبے کو سراہتے ہوئے امید ظاہر کی کہ اس تربیت سے حاصل کردہ مہارتیں یونیورسٹی آف سرگودھا کی ترقی میں مثبت کردار ادا کریں گی۔

کنسلٹنٹ ہیومن ریسورس ڈویلپمنٹ سنٹر خورشید یوسف نے کہا کہ اس ورکشاپ کا بنیادی مقصد شرکاء کو جدید مہارتوں اور عملی حکمت عملیوں سے روشناس کروانا تھا، تاکہ وہ اپنے شعبوں میں مزید مؤثر انداز میں کام کر سکیں۔انہوں نے ورکشاپ کے دوران شرکاء کی بھرپور شرکت اور مثبت رویے کو سراہتے ہوئے اسے ایک کامیاب اور نتیجہ خیز تربیتی تجربہ قرار دیا۔ انہوں نے اس عزم کا اظہار کیا کہ ایچ آر ڈی سی مستقبل میں بھی اسی طرح کی تربیتی سرگرمیوں کا انعقاد جاری رکھے گا تاکہ جامعہ کے تدریسی اور انتظامی ڈھانچے کو مزید مستحکم بنایا جا سکے۔تقریب کے اختتام پر وائس چانسلر نے ورکشاپ کے شرکاء میں اعزازی سرٹیفکیٹ تقسیم کیے۔