اوپن یونیورسٹی میں سکالرشپ حاصل کرنے والے طلبہ کے اعزاز میں تقریب کا انعقاد

منگل 29 اپریل 2025 19:54

اسلام آباد (اُردو پوائنٹ اخبارتازہ ترین - اے پی پی۔ 29 اپریل2025ء) علامہ اقبال اوپن یونیورسٹی میں فائنل ایئر پراجیکٹ گرانٹ اور میرٹ سکالرشپس حاصل کرنے والے طلبہ کے اعزاز میں ایک پروقار تقریب منعقد ہوئی جس میں وائس چانسلر پروفیسر ڈاکٹر ناصر محمود نے بطور مہمان خصوصی شرکت کی۔اپنے خطاب میں ڈاکٹر ناصر محمود نے کہا کہ تعلیم کے معیار پر توجہ دینا وقت کی اہم ترین ضرورت ہے، خوشی کی بات ہے کہ علامہ اقبال اوپن یونیورسٹی کو ٹائمز ہائر ایجوکیشن کی امپیکٹ رینکنگ 2024 میں پائیدار ترقی کے ہدف نمبر 4 (معیاری تعلیم) کے تحت اول پوزیشن حاصل ہوئی ہے جو ہماری تعلیمی خدمات کا عالمی سطح پر اعتراف ہے۔

انہوں نے کہا کہ یونیورسٹی باصلاحیت اور محنتی طلبہ کو میرٹ سکالرشپس فراہم کرتی ہے جبکہ مالی طور پر کمزور طلبہ کو فیس میں خصوصی رعایت دی جاتی ہے۔

(جاری ہے)

ان کا کہنا تھا کہ ایک محقق کے لیے ضروری ہے کہ وہ تحقیق کے بنیادی اصولوں اور بین الاقوامی معیارات کو پیش نظر رکھے تاکہ اس کا کام جامع، موثر اور قابل عمل ہو۔تقریب کا انعقاد ڈائریکٹوریٹ آف سٹوڈنٹ ایڈوائزری اینڈ کونسلنگ سروسز کے زیر اہتمام کیا گیاجس میں 239 طلبہ کو میرٹ سکالرشپس سے نوازا گیا جبکہ 12 طلبہ کو فائنل ائیر پراجیکٹ گرانٹ دیا گیا۔

وائس چانسلر نے سکالرشپ جیتنے والے طلبہ کو مبارکباد دی اور کہا کہ یہ سکالرشپس نہ صرف ٹیلنٹ کی حوصلہ افزائی کے لیے دی جاتی ہیں بلکہ ان کا مقصد مستحق طلبہ کو تعلیم مکمل کرنے میں معاونت فراہم کرنا بھی ہے۔تقریب سے خطاب کرتے ہوئے پروفیسر ڈاکٹر ارشاد احمد ارشد نے کہا کہ تعلیم ہر فرد کا بنیادی حق ہے اور اوپن یونیورسٹی اس حق کی فراہمی میں کلیدی کردار ادا کر رہی ہے۔

انہوں نے اعلان کیا کہ وائس چانسلر کے وژن کے تحت پی ایچ ڈی سکالرز کے لیے مکمل فنڈڈ سکالرشپس کا آغاز ڑبھی جلدکیا جائے گا۔ڈاکٹر ارشاد نے مزید بتایا کہ یونیورسٹی نے سکالرشپس کی مد میں 120 ارب روپے مختص کیے ہیں تاکہ زیادہ سے زیادہ طلبہ اس سہولت سے فائدہ اٹھا سکیں۔تقریب کے اختتام پر ڈائریکٹر سٹوڈنٹ افیئرز سید غلام کاظم علی نے تمام شرکا کا شکریہ ادا کرتے ہوئے کہا کہ طلبہ کی کامیابیاں یونیورسٹی کی مجموعی ترقی کا عکس ہیں۔