لفظ پاکستان کی تکمیل بھی کشمیر کے بغیرممکن نہیں ہوتی،چوہدری انوارالحق

مقبوضہ جموں وکشمیر میں جاری تحریک آزادی درحقیقت اسی تصور پاکستان کی تکمیل کی جدوجہد ہے پاکستان کو غیر مستحکم کرنے کیلئے ملک دشمن قوتیں فتنہ الخوارج و دیگر دہشتگرد تنظیموں کا سہارا لے رہی ہیں،وزیراعظم آزادکشمیر

اتوار 23 مارچ 2025 15:45

مظفر آباد (اُردو پوائنٹ اخبارتازہ ترین - این این آئی۔ 23 مارچ2025ء)وزیراعظم آزادحکومت ریاست جموں وکشمیر چوہدری انوار الحق نے کہا ہے کہ 23 مارچ 1940 کو پہلی مرتبہ ایک الگ اور خودمختار ریاست کی تحریک آئینی اور قانونی خدوخال میں پیش کی گئی، اس میں ان علاقوں، صوبوں اورخطوں کی نشاندہی کی گئی جوپاکستان میں شامل کیے جانے تھے،یہ وہ تاریخ ساز دن ہے جب مسلمانان برصغیر کی قیادت نے دنیا کی واحد اسلامی نظریاتی مملکت کا تصور وضع کیا۔

اپنے خصوصی ویڈیو پیغام میں وزیراعظم چوہدری انوارالحق نے کہا کہ قائد اعظم محمد علی جناح کی ولولہ انگیز قیادت میں مسلمانان برصغیر نے ایمان،اتحاد اور تنظیم کے سنہرے اصولوں کو اپناتے ہوئے 14 اگست 1947 کو مملکت خداداد پاکستان کا خواب شرمندہ تعبیر کیا۔

(جاری ہے)

انہوںنے کہاکہ پاکستان کے حصول کی جدوجہد میں لاکھوں مسلمانان برصغیر کی قربانیاں اور ہجرتیں شامل ہیں،ریاست جموں و کشمیر کے نمائندگان کی اقبال پارک کے اس اجلاس میں شرکت اس بات کی غمازی کرتی تھی کہ یہ خواب کشمیریوں نے بھی پاکستان کی دیگر اکائیوں کے ساتھ مل کر دیکھا،یہی وجہ ہے کہ لفظ پاکستان کی تکمیل بھی کشمیر کے بغیرممکن نہیں ہوتی،پاکستان اورجموں کشمیر کے عوام آج بھی اس رشتہ کی اپنے خون سے آبیاری کر رہے ہیں۔

وزیراعظم نے کہاکہ مقبوضہ جموں وکشمیر میں جاری تحریک آزادی درحقیقت اسی تصور پاکستان کی تکمیل کی جدوجہد ہے۔ چوہدری انوار الحق نے کہا کہ پاکستان کو غیر مستحکم کرنے کیلئے ملک دشمن قوتیں فتنہ الخوارج اور دیگر دہشتگرد تنظیموں کا سہارا لے رہی ہیں،پاکستان کی بہادر افواج ان فتنوں کی سرکوبی اور اپنے وطن کے دفاع، سلامتی اور استحکام کے لیے جانوں کی قربانیاں پیش کر رہی ہیں۔

انہوںنے کہاکہ پاکستان کی قوم اپنی بہادر افواج کی پشت پر ہیں،آج کے دن قیام پاکستان کی جدوجہد اور دفاع پاکستان کیلئے قربانیاں پیش کرنے والے شہداء کو خراج عقیدت پیش کرتے ہیں، تکمیل پاکستان کی جدوجہد میں مقبوضہ جموں وکشمیر میں جان، مال، عزت اور آبرو کی قربانیاں پیش کرنے والوں کو سلام عقیدت پیش کرتے ہیں،انشاء اللہ کشمیریوں کی عظیم قربانیاں رنگ لائیں گی اور تحریک آزادی کشمیر اپنے منطقی انجام تحریک تکمیل پاکستان کی منزل بہرصورت حاصل کرکے رہے گی۔