سعودی عرب میں نماز عید طلوع آفتاب کے 15 منٹ بعد ہوگی، وزارت اسلامی امور

پیر 24 مارچ 2025 10:20

ریاض (اُردو پوائنٹ اخبارتازہ ترین - اے پی پی۔ 24 مارچ2025ء) سعودی وزارت اسلامی امور نے مملکت کے تمام ریجنز کی مساجد اور عیدگاہوں میں عیدالفطر کی نماز ام القری کیلنڈر کے مطابق سورج طلوع ہونے کے 15 منٹ بعد ادا کرنے کی ہدایت ہے۔

(جاری ہے)

اردو نیوز کے مطابق سعودی وزیر اسلامی امور ڈاکٹر عبدالطیف بن عبدالعزیز آل شیخ نے وزارت کی برانچز کو گزشتہ روز سرکلر جاری کیا ہے جس میں تمام جامع مساجد اور عید گاہوں میں نماز کا اہتمام کرنے کے لئے کہا گیا ہے ماسوائے ان مساجد کے جو عید گاہ کے قریب واقع ہیں اور جہاں لوگ عید کی نماز کے لئے نہیں جاتے۔

سرکلر میں کہا گیا کہ عید گاہوں میں نماز ادا کی جائے گی جبکہ بارش کی صورت میں مقرر کردہ مساجد میں نمازعید ہوگی۔سرکلر میں مینٹی ننس کمپنیوں کو عید الفطر کی نماز کے لئے تمام انتظامات اور ضروری خدمات مکمل کرنے کی بھی ہدایت کی گئی ہے۔ مملکت کے ہرعلاقے میں عیدالفطر منانے کے لئے اپنی مخصوص روایات ہیں، تاہم ان سب میں جو چیز مشترک ہے وہ ہے دعا، خیرات، مہمان نوازی، اچھا کھانا، عمدہ لباس، سجاوٹ اور رشتہ داروں کے ساتھ وقت گزارنا ہے۔