بطور کپتان زیادہ ٹونٹی ٹونٹی فتوحات، شعیب ملک نے سرفراز احمد کا ریکارڈ برابر کردیا

43 سالہ شعیب ملک نیشنل کپ 2025ء میں سیالکوٹ سٹالینز کی کپتانی کر رہے ہیں

ذیشان مہتاب منگل 25 مارچ 2025 11:18

بطور کپتان زیادہ ٹونٹی ٹونٹی فتوحات، شعیب ملک نے سرفراز احمد کا ریکارڈ ..

فیصل آباد (اردو پوائنٹ تازہ ترین اخبار ۔ 25 مارچ 2025ء ) آل رائونڈر شعیب ملک نے بطور کپتان زیادہ ٹونٹی ٹونٹی مقابلے جیتنے کا سرفراز احمد کا ریکارڈ برابر کردیا ہے ۔

43 سالہ شعیب ملک نیشنل کپ 2025ء میں سیالکوٹ سٹالینز کی کپتانی کر رہے ہیں اور بطور کپتان اب تک اپنے کیریئر میں 93 ٹونٹی ٹونٹی مقابلے جیت چکے ہیں، ان کے علاوہ وکٹ کیپر بیٹر سرفراز احمد نے بھی بطور کپتان اتنے ہی ٹونٹی ٹوٹنی میچز میں کامیابی حاصل کررکھی ہے۔

اس فہرست میں تیسرا نمبر بابر اعظم کا ہے جو اب تک 68 ٹونٹی ٹونٹی میچز میں بطور کپتان کامیابی حاصل کرچکے ہیں، مصباح الحق 61 میچز جیت کر اس فہرست میں چوتھے جب کہ محمد حفیظ 48 کامیابیوں کے ساتھ پانچویں نمبر پر ہیں۔

دوسری جانب نیشنل ٹی ٹوئنٹی کپ میں پشاور اور لاہور بلیوز کی ٹیمیں سیمی فائنل میں پہنچ گئیں۔

(جاری ہے)

اقبال اسٹیڈیم فیصل آباد میں کھیلے گئے چوتھے کوارٹرفائنل میں لاہور نے سیالکوٹ کو 33 رنز سے شکست دیدی، اس سے قبل تیسرے کوارٹرفائنل میں پشاور نے فیصل آباد کو 3 وکٹوں سے ہرایا۔

چوتھے کوارٹرفائنل میں سیالکوٹ نے ٹاس جیت کر لاہور کو بیٹنگ دی جو 20 اوورز میں 184 رنز بناکر آؤٹ ہوگئی۔عمرصدیق نے3 چھکوں اور6 چوکوں کی مدد سے 65 رنز بنائے۔ حسن علی نے 42 رنز دے کر4 وکٹیں حاصل کیں۔اسامہ میر نے دو کھلاڑی آؤٹ کیے۔ سیالکوٹ کی ٹیم 19 ویں اوور میں151 رنز بناکر آؤٹ ہوگئی۔ مرزا طاہر بیگ نے 5 چوکوں اور5 چھکوں کی مدد سے77 رنز اسکور کیے۔

حسن علی نے تین چھکوں اور ایک چوکے کی مدد سے 25 رنز بنائے۔ حسین طلعت۔ نثار احمد اور محمد رضوان نے دو دو وکٹیں حاصل کیں۔ عمر صدیق پلیئر آف دی میچ قرار پائے۔

تیسرے کوارٹر فائنل میں فیصل آباد نے ٹاس جیت کر پہلے بیٹنگ کرتے ہوئے7 وکٹوں پر 138 رنز بنائے، علی شان نے51 رنز اسکور کیے، عامرخان نے 25 رنز دے کر3 وکٹیں حاصل کیں۔ پشاور نے آخری اوور میں7 وکٹوں کے نقصان پر مطلوبہ اسکور پورا کرلیا۔

اسراراللہ 30 رنز بناکر ٹاپ اسکورر رہے۔ احمد صفی عبداللہ نے20 رنز دے کر3 وکٹیں حاصل کیں۔محمد عامر خان پلیئر آف دی میچ قرار پائے۔

سیمی فائنل میں پشاور کا مقابلہ ایبٹ آباد سے ہوگا جبکہ دوسرا سیمی فائنل لاہور بلوز اور ملتان کے درمیان کھیلا جائے گا۔ دونوں سیمی فائنلز بدھ کو اقبال سٹیڈیم کھیلے جائیں گے۔