پیری اربن پلان کے تحت فیصل آباد کی زوننگ،نئی تعمیرات اور ہاؤسنگ کالونیوں کیلئے انوائرمنٹل امپیکٹ رپورٹ کو لازمی قرار دیدیا گیا

فیصل آباد (اُردو پوائنٹ اخبارتازہ ترین - اے پی پی۔ 25 مارچ2025ء) ڈائریکٹر جنرل فیصل آباد ڈویلپمنٹ اتھارٹی (ایف ڈی اے) محمد آصف چوہدری نے کہا ہے کہ پیری اربن پلان کے تحت فیصل آبادشہر کی زوننگ مکمل کرلی گئی ہے اورنئی تعمیرات و ہاؤسنگ کالونیوں کیلئے انوائرمنٹل امپیکٹ رپورٹ کو لازمی قرار دیدیا گیاہے ۔ انہوں نے یہ بات منگل کو فیصل آباد چیمبر آف کامرس اینڈانڈسٹری میں بزنس کمیونٹی اور رئیل اسٹیٹ کے شعبہ سے تعلق رکھنے والے افراد سے گفتگو کرتے ہوئے کہی۔

انہوں نے کہا کہ دوسرے مجوزہ ماسٹر پلان کو ختم کر کے فیصل آباد کی منظم ترقی کیلئے فی الحال پیری اربن پلان کے تحت منصوبہ بندی کی جا رہی ہے تاہم شہری ترقی کے حوالے سے زیادہ تر مسائل قانون پر عملدرآمد نہ ہونے کی وجہ سے پیش آرہے ہیں جن کو حل کرنے کیلئے زمینی حقائق کے مطابق حکمت عملی اختیار کرنا ہو گی۔

(جاری ہے)

انہوں نے بتایا کہ زوننگ کے تحت براؤن ایریا 30ہزار ایکڑ کم ہوا ہے جبکہ صوبائی سطح پر فیصل آباد سمیت 125شہروں کے آؤٹ لائن ڈویلپمنٹ پلان بھی تیار کئے گئے ہیں۔

وسائل کے حوالے سے انہوں نے کہا کہ ایف ڈی اے ڈیپازٹ ورک کے تحت کام کرتا ہے اور سکیموں کو مکمل کرنے کے بعد کارپوریشن یا دیگر متعلقہ اداروں کے سپرد کر دیا جاتا ہے جن کی مرمت وغیرہ ایف ڈی اے کے دائرہ کار میں نہیں آتی تاہم انہوں نے بتایا کہ شہر کی سڑکوں کی عمومی حالات بہت خراب ہے لیکن ایف ڈی اے نے شیخوپورہ روڈ کو سٹیٹ آف دی آرٹ بنانے کی منصوبہ بندی کی ہے۔

انہوں نے بتایا کہ فیصل آباد چیمبر کے سامنے ریمپ بھی تعمیر کیا جائے گا -انہوں نے بتایا کہ ٹریٹ بیکری چوک کی ری ویمپنگ کی جائے گی۔ ایف ڈی اے سٹی کے حوالے سے انہوں نے کہا کہ فیسکو سے معاملات طے ہو گئے ہیں جبکہ 18میں سے 14ٹرانسفر مکمل ہو گئے ہیں اور توقع ہے کہ باقی بھی اس سال کے آخرتک چالو ہو جائیں گے۔ اسی طرح سنٹرل پارک اور سپورٹس کمپلیکس کے بعد ڈی پی ایس کیمپس کی عمارت چھت تک پہنچ گئی ہے جبکہ سیکورٹی کے نظام کو بھی بہتر بنا دیا گیا ہے جس سے اس کی آباد کاری کا عمل تیز ہو گا۔

انہوں نے کہا کہ سرکاری کالونیوں کے پورے ریکارڈ کو ڈیجیٹلائز کرنے کے بعد آپس میں منسلک کر دیا جائے گا جس سے ٹرانسفر کے کیسوں کو تیز رفتاری سے نمٹایا جا سکے گا۔ انہوں نے کہا کہ پہلے سے بنی ہوئی غیر قانونی کالونیوں کو ریگولر ائز کرنے کیلئے بھی کوئی درمیانی راستہ نکالنے کی کوشش کی جا رہی ہے۔ انہوں نے بتایا کہ واسا کو 11بلین کی فنڈنگ مل گئی ہے جس سے سیوریج کے نظام کی ری ویمپنگ کی جائے گی۔

انہوں نے کہا کہ واسا کی سروس ایریا میں توسیع کی بھی ضرورت ہے تاکہ اس میں بننے والی نجی رہائشی کالونیوں کو بھی سیوریج کی سہولت مہیا کی جا سکے۔ ڈائریکٹر جنرل نے بتایا کہ میٹرو بس سروس کا منصوبہ الیکٹرک بسوں سے بالکل الگ ہے۔ فیصل آباد کیلئے 86بسیں مختص کی گئی ہیں جو چھ روٹوں پر چلیں گی۔ اس سے قبل فیصل آباد چیمبر آف کامرس اینڈانڈسٹری کے صدر ریحان نسیم بھراڑہ نے ڈائریکٹر جنرل ایف ڈی اے کا خیر مقدم کرتے ہوئے شہری مسائل پر روشنی ڈالی اور کہا کہ اس شہر کا سب سے اہم مسئلہ وسائل کی کمی ہے اسلئے پروونشل فنانس کمیشن کی طر ز پر ڈسٹرکٹ فنانس کمیشن قائم کیا جائے تاکہ ہر شہر کو اس کی آبادی کے تناسب سے محاصل میں سے حصہ مل سکے۔

سوال و جواب کی نشست میں وحید خالق رامے، رانا فیاض احمد، طارق محمود قادری، رانا سکندر اعظم، میاں تنویر، چوہدری محمد نواز، میاں محمد عامر، عامر شہزاد اور شیخ محمد یٰسین سمیت دیگر ممبران نے حصہ لیا۔ آخر میں سینئر نائب صدر قیصر شمس گچھا نے مہمانوں کا شکریہ ادا کیا جبکہ صدر ریحان نسیم بھراڑہ نے ڈائریکٹر جنرل ایف ڈی اے محمد آصف چوہدری کو چیمبر کی گولڈن جوبلی تقریبات کے سلسلہ میں خصوصی پن لگائی اور شیلڈ بھی پیش کی۔