دانش یونیورسٹی خود مختار ادارہ ،انتظام غیر حکومتی طرز پر چلایا جائے گا، اعظم نذیرتارڑ

منگل 25 مارچ 2025 22:01

دانش یونیورسٹی خود مختار ادارہ ،انتظام غیر حکومتی طرز پر چلایا جائے ..
اسلام آباد (اُردو پوائنٹ اخبارتازہ ترین - این این آئی۔ 25 مارچ2025ء)وزیر قانون اعظم نذیر تارڑ نے کہاہے کہ دانش یونیورسٹی خود مختار ادارہ ہوگا،انتظام غیر حکومتی طرز پر چلایا جائے گا،یونیورسٹی کے قیام کا مقصد مالی مشکلات کے شکار ہونہار طلبہ کو معیاری اور عالمی سطح کی تعلیم کی فراہمی ہے۔ وزیراعظم شہباز شریف کی ہدایت پر منگل کو وزیر قانون اعظم نذیر تارڑ کی زیر صدارت دانش یونیورسٹی کے قانونی فریم ورک کے حوالے سے ایک اہم اجلاس منعقد ہوا۔

اجلاس میں چیئرمین ہائر ایجوکیشن کمیشن (HEC) سمیت دیگر اعلیٰ حکام نے شرکت کی۔وزیر قانون نے اجلاس کے دوران واضح کیا کہ دانش یونیورسٹی ایک خود مختار ادارہ ہوگا، جس کا انتظام غیر حکومتی طرز پر چلایا جائے گا۔ انہوں نے اس بات پر زور دیا کہ یونیورسٹی کے قانونی ڈھانچے کو جدید خطوط پر استوار کیا جائے گا تاکہ یہ دنیا کی بہترین جامعات کے معیار کے مطابق ہو۔

(جاری ہے)

اجلاس میں یونیورسٹی کے انڈوومنٹ فنڈ کے قیام پر بھی گفتگو ہوئی، جس کا مقصد مالی مشکلات کے شکار ہونہار طلبہ کو معیاری اور عالمی سطح کی تعلیم فراہم کرنا ہے۔ وزیر قانون نے کہا کہ اس تعلیمی ادارے کے قیام کے لیے دنیا بھر کے کامیاب تعلیمی ماڈلز کا جائزہ لیا جا رہا ہے، تاکہ اسے ایک بین الاقوامی معیار کی درسگاہ بنایا جا سکے۔اجلاس کے دوران شرکاء نے اس بات پر اتفاق کیا کہ دانش یونیورسٹی تحقیق، ترقی، اور اپلائیڈ سائنسز پر مرکوز ہوگی، اس ضمن میں ایک جامع قانونی فریم ورک تشکیل دیا جا رہا ہے، جو مستقبل کے طلبہ کے لیے ایک مثالی تعلیمی ماحول فراہم کرے گا۔

وزیر قانون نے کہا کہ تمام قانونی اور انتظامی پہلوئوں کو مدنظر رکھتے ہوئے فریم ورک کو جلد از جلد حتمی شکل دی جائے گی تاکہ اس منصوبے کو عملی جامہ پہنایا جا سکے۔