سیکرٹری داخلہ پنجاب سے فرانزک سائنس اتھارٹی سے منسلک زیر تربیت اے ایس پیز وفد کی ملاقات

بدھ 26 مارچ 2025 20:28

لاہور (اُردو پوائنٹ اخبارتازہ ترین - اے پی پی۔ 26 مارچ2025ء) سیکرٹری داخلہ پنجاب نور الامین مینگل سے زیر تربیت اے ایس پیز کے وفد نے سول سیکرٹریٹ میں ملاقات کی۔محکمہ داخلہ پنجاب کا دورہ کرنے والے 17 انڈر ٹریننگ اے ایس پیز ان دنوں تربیت کیلئے پنجاب فرانزک سائنس اتھارٹی کیساتھ منسلک ہیں۔ سیکرٹری داخلہ پنجاب نے نوجوان افسران سے گفتگو کرتے ہوئے بتایا کہ وزیراعلی پنجاب کی ہدایت پر فرانزک سائنس اتھارٹی کو جدید تقاضوں سے ہم آہنگ کر رہے ہیں، فرانزک سائنس اتھارٹی اب ریفرل لیب کی بجائے پروایکٹو کردار ادا کرے گی اور پوٹھوہار و ملتان میں لیب کے قیام سے جہاں استعداد میں اضافہ ہوگا وہیں پینڈنگ کیسز کو حل کرنے میں مدد ملے گی۔

سیکرٹری داخلہ پنجاب نے مزید بتایا کہ محکمہ داخلہ نے گزشتہ ایک سال میں 100سال سے زائد عرصے سے منجمد قوانین کو اپڈیٹ کیا اورقدیم قوانین کو جدید تقاضوں سے ہم آہنگ کر کے معاشرے کیلئے مفید بنا رہے ہیں۔

(جاری ہے)

نور الامین مینگل نے کہا کہ گزشتہ ایک سال میں محکمہ جیل خانہ جات میں تاریخی ریفارمز کیے جن سے اسیران، اہل خانہ اور سوسائٹی سب کا فائدہ ہو رہا ہے۔

سیکرٹری داخلہ پنجاب نے پروفیشنل سروس کنڈکٹ بارے نوجوان افسران کی رہنمائی کی اور کہا کہ نوجوان افسران کیریئر کے ابتدا سے ہی اپنے کام پر توجہ دیں ، اپنی سمت درست رکھیں اور جذبہ خدمت کے تحت بھرپور محنت سے عوامی مسائل کے حل میں اپنا کردار ادا کریں۔اس موقع پر سیکرٹری داخلہ پنجاب نے انڈر ٹریننگ اے ایس پیز کے سوالات کے جوابات بھی دیئے۔ ملاقات کے اختتام پر سیکرٹری داخلہ نے انڈر ٹریننگ افسران کو اعزازی شیلڈز پیش کیں۔ سپیشل سیکرٹری داخلہ فضل الرحمان، ایس ایس پی عثمان باجوہ، ڈائریکٹر ایڈمن پنجاب فرانزک سائنس اتھارٹی ولید بیگ اور متعلقہ افسران بھی اس موقع پر موجود تھے۔