واسا لاہور کے بارشی پانی کو محفوظ کرنے کے لیے زیر زمین واٹر ٹینکس کی تعمیر کا سلسلہ جاری

جمعہ 28 مارچ 2025 21:10

لاہور (اُردو پوائنٹ اخبارتازہ ترین - اے پی پی۔ 28 مارچ2025ء) واسا لاہور کے بارشی پانی کو محفوظ کرنے کے لیے زیر زمین واٹر ٹینکس کی تعمیر کا سلسلہ تیزی سے جاری ہے۔صوبائی وزیر ہائوسنگ بلال یاسین نے وائس چیئرمین واسا چوہدری شہباز احمد کے ہمراہ وارث روڈ پرزیر زمین واٹر ٹینک منصوبہ کا افتتاح کیا۔ ایم ڈی واسا غفران احمد نے صوبائی وزیرکو زیر زمین ٹینک کے متعلق تفصیلی بریفنگ دی ۔

بلال یاسین نے میڈیا سے گفتگو کرتے ہوئے بتایا کہ وارث روڈ زیر زمین واٹر ٹینک منصوبہ546 ملین کی لاگت سے مکمل کیا جائے گا۔اس منصوبے کو 3 ماہ میں مکمل کر لیا جائے گا جبکہ 15 لاکھ گیلن بارشی پانی کو محفوظ کیا جا سکے گا۔ اس منصوبے کی تکمیل سے قبل بارش سے وارث روڈ سے ملحقہ آبادی متاثر رہتی تھی۔

(جاری ہے)

وزیر اعلیٰ پنجاب کے شکر گزار ہیں جنہوں نے عوام الناس کے مسائل کے فوری حل کیلئے وسائل فراہم کیے،وزیر ہائوسنگ نے منصوبے کو تمام وسائل کو بروئے کار لاتے ہوئے بروقت مکمل کرنے کی ہدایات دیں۔

انہوں نے مزید کہ تمام تعمیراتی کام میں اعلی معیار اور جدید ٹیکنالوجی کو یقینی بنایا جائے تاکہ منصوبہ طویل المدتی فوائد فراہم کر سکے۔منصوبے کے دوران مقامی آبادی کو کم سے کم مشکلات کا سامنا ہو، اس کے لیے متبادل انتظامات بھی یقینی بنانے کے احکامات جاری کیے ۔