مسجد الحرام میں تراویح اور ختم قرآن کی دعا میں 25 لاکھ فرزندان اسلام کی شرکت

ہفتہ 29 مارچ 2025 08:50

مکہ مکرمہ (اُردو پوائنٹ اخبارتازہ ترین - اے پی پی۔ 29 مارچ2025ء) مسجد الحرام میں رمضان المبارک کی 29 ویں شب کو 25 لاکھ سے زائد فرزندان اسلام نےتراویح اور ختم قرآن کی دعا میں شرکت کی۔ ایس پی اے کے مطابق مسجد الحرام میں انتظامیہ کی جانب سے زائرین کی بڑی تعداد کے پیش نظر مثالی انتظامات کیے گئے ۔ سکیورٹی اہلکاروں کے ساتھ رضاکار اور شہری دفاع کے یونٹس بھی زائرین کی آمد رفت کو منظم رکھنے میں پیش پیش رہے۔

(جاری ہے)

مسجد الحرام کے اندر، سعودی عرب کی تیسری توسیع کے علاوہ دوسری اور تیسری منزل اور چھت کے علاوہ بیرونی صحن اور راستے بھی دعائے ختم قرآن کے وقت فرزندان اسلام سے بھرے ہوئے تاہم سکیورٹی کے مثالی انتظامات کی وجہ سے راہداریاں آمد ورفت کے لیے کھلی تھیں۔مسجد الحرام کے اندر اور بیرونی صحنوں میں صفائی کے بھی خصوصی انتظامات کیے گئے جس کے لیے اضافی کارکناں کو تعینات کیا گیا جبکہ معمر اور معذور افراد کے لیے مسجد الحرام میں داخل ہونے کے مخصوص راستوں پر اہلکاروں کو تعینات کیا گیا ۔ ختم قرآن کی دعا میں 25 لاکھ سے زائد فرزندان اسلام نے امت مسلمہ کے لئے دنیا و آخرت کی کامیابی اور دنیا بھر میں امن و سکون کے لئے دعا ئیں کیں۔