اسسٹنٹ کمشنر سمبڑیال كی جنتر کی کاشت اپریل سے شروع كی ہدایت

جمعرات 3 اپریل 2025 15:13

سمبڑیال (اُردو پوائنٹ اخبارتازہ ترین - اے پی پی۔ 03 اپریل2025ء) اسسٹنٹ کمشنر سمبڑیال ڈاکٹر افتخار احمد وڑائچ نے کہا ہے کہ جنتر کی کاشت اپریل سے شروع کردیں۔ ان خیالات کا اظہار انہوں نے کاشتکاروں کے نام اپنے ایک پیغام میں کیا ہے۔ انہوں نے کہا ہے کہ جنتر کی کاشت کیلئے ہلکی میرازمین کو موزوں ہوتی ہے اور جنتر کی کاشت کیلئے موزوں وقت اپریل سے لے کر اگست تک کا ہوتا ہے۔

انہوں نے کہا کہ کاشتکار اچھی پیداوار حاصل کرنے کیلئے معیاری بیج استعمال کریں۔

(جاری ہے)

انہوں نے کہا کہ زمین کی تیاری کیلئے دو سے تین مرتبہ ہل چلا کر سہاگہ دیتے ہوئے زمین کو اچھی طرح نرم و بھربھرا کر لینا چاہئے تاکہ بہتر اگائو ہو سکے۔ انہوں نے بتایاکہ جنتر کی کاشت اپریل سے لے کر اگست تک کی جاسکتی ہے البتہ مون سون کے دوران کاشتہ فصلوں کی بڑھوتری بہت اچھی ہوتی ہے۔انہوں نے جنتر کی بطور سبز چارہ کھاد کاشت کیلئے 20 سے25 کلوگرام جبکہ بیج حاصل کرنے کیلئے 10 سے 12کلوگرام فی ایکڑ بیج استعمال کرنے کی ہدایت کی ہے۔ انہوں نے کہاکہ کاشت کے وقت کھیت میں ایک بوری ڈی اے پی فی ایکڑ ڈالی جائے اور وتر میں کاشت شدہ فصل کو پہلا پانی بوائی کے 18سے 22دن کے بعد لگایاجائے ۔