مریم نواز نے پنجاب میں مختلف شہروں کیلئے 1500 الیکٹرک بسیں چلانے کے پروجیکٹ کی اصولی منظوری دیدی

وزیراعلیٰ پنجاب کی فیصل آباد میں اورنج اور ریڈ بس سروس چلانے اورلاہور میں جدید ترین ٹرانسپورٹ ٹاور کمانڈ اینڈ کنٹرول سنٹر کی بھی منظوری،مریم نواز کی زیر صدارت ٹرانسپورٹ ڈیپارٹمنٹ کا خصوصی اجلاس

فیصل علوی پیر 7 اپریل 2025 17:31

مریم نواز نے پنجاب میں مختلف شہروں کیلئے 1500 الیکٹرک بسیں چلانے کے پروجیکٹ ..

لاہور(اردوپوائنٹ اخبار تازہ ترین۔07اپریل 2025)پنجاب میں مختلف شہروں کیلئے 1500الیکٹرک بسیں چلانے کے پروجیکٹ کی اصولی منظوری دیدی گئی، وزیراعلیٰ پنجاب مریم نواز نے فیصل آباد میں اورنج اور ریڈ بس سروس چلانے کی بھی منظوری دیدی،وزیراعلیٰ مریم نوازشریف کی زیر صدارت ٹرانسپورٹ ڈیپارٹمنٹ کا خصوصی اجلاس ہوا،وزیراعلیٰ مریم نوازشریف نے لاہور میں جدید ترین ٹرانسپورٹ ٹاور کمانڈ اینڈ کنٹرول سنٹر کی بھی منظوری دی۔

مریم نواز کی زیر صدارت ہونے والے اجلاس میں پہلے مرحلے میں 380 الیکٹرک بسوں کی خریداری کا عمل جلد از جلد مکمل کرنے کا حکم دیا گیا۔ پہلے مرحلے میں لاہور اور گوجرانوالہ میں الیکٹرک بسیں چلائی جائیں گی۔پنجاب کے دور دراز بڑے شہروں میں مرحلہ وار الیکٹرک بسوں پر مشتمل ٹرانسپورٹ سسٹم شروع کیا جائے گا۔

(جاری ہے)

اجلاس میں لاہور میں یلیو لائن الیکٹرک بس کے ٹریک کی پلاننگ کیلئے 15روز کی مہلت دی گئی جب کہ مریم نواز نے الیکٹرک بسوں کے چارجنگ سٹیشن قائم کرنے کیلئے پلان بھی طلب کر لیا۔

اجلاس میں فیصلہ کیا گیا کہ فیصل آباد میں اورنج اور ریڈ بس سروس شروع کی جائے گی۔ سمندری روڈ تا سرگودھا روڈ ریڈ بس سروس اور جڑانوالہ تا جھنگ روڈ اورنج بس سروس شروع کی جائے گی۔اجلاس میں وزیر اعلیٰ مریم نواز نے فیصل آباد اور گوجرانوالہ میں الیکٹرک بس کے ٹریک کیلئے پلان طلب کر لیا۔اجلاس میں سرگودھا، شیخوپورہ، سیالکوٹ، گجرات، رحیم یار خان، ڈی جی خان سمیت 6 اضلاع میں نئے ٹرانسپورٹ سسٹم پر اتفاق کیا گیا۔

وزیر اعلیٰ پنجاب مریم نواز شریف نے لاہور، گوجرانوالہ الیکٹرک بس سروس کیلئے اگلے جون تک کی ڈیڈلائن مقرر کردی۔اجلاس میں گفتگو کرتے ہوئے وزیراعلیٰ پنجاب مریم نواز کا کہنا تھا کہ میری خواہش ہے کہ پنجاب کے ہر بڑے شہر میں شاندار اور جدید ترین بس سسٹم موجود ہو۔ترقی کے سفر میں سب کو شریک کرنے کیلئے دیگر شہروں میں الیکٹرک بس چلائی جائے گی۔انہوں نے کہا کہ سب کی وزیر اعلیٰ ہوں۔ لاہور ہی نہیں باقی شہروں کے عوام کا بھی جدید ٹرانسپورٹ سسٹم پر پورا حق ہے۔