محکمہ ہیلتھ حکومت آزاد جموں وکشمیر کے دعوے دھرے کے دھرے رہ گئے

غربت کی چکی میں پسے عوام کے لیے زندگی کی بنیادی ضرورت صحت اور تعلیم مزید مہنگی ہو گئی

منگل 8 اپریل 2025 16:40

مظفرآباد(اُردو پوائنٹ اخبارتازہ ترین - این این آئی۔ 08 اپریل2025ء) محکمہ ہیلتھ حکومت آزاد جموں وکشمیر کے دعوے دھرے کے دھرے رہ گئے، غربت کی چکی میں پسے عوام کے لیے زندگی کی بنیادی ضرورت صحت اور تعلیم مزید مہنگی ہو گئی۔دستیاب حکومتی دستاویز کے مطابق ایک ماہ کے دوران صحت کی سہولتیں 14.76 فیصد جب کہ تعلیم کی سہولتیں 7.96 فیصد مہنگی ہوئیں۔دستاویز کے اعداد وشمار میں بتایا گیا ہے کہ ایک ماہ میں شہروں میں صحت کی سہولتیں مجموعی طور پر 14.76 فیصد جب کہ دیہات میں یہ اضافہ 12.84 فیصد ریکارڈ کیا گیا۔

ایک ماہ کے دوران دوائوں کی قیمت میں 15.26 فیصد اضافہ ریکارڈ کیا گیا۔ ڈینٹل سروسز 27.20 فیصد، ڈاکٹر کی فیس 14.80 فیصد بڑھی جب کہ میڈیکل ٹیسٹ ایک ماہ میں 15.53 فیصد مہنگے ہوئے۔ماہانہ بنیادوں پر تھراپی کا ساز وسامان 94.92 فیصد مہنگا ہوا۔

(جاری ہے)

اسی عرصے میں اسپتال سروسز 12.92 فیصد مہنگی ہوئیں۔ایک ماہ کے دوران شعبہ تعلیم میں بھی مہنگائی ہوئی اور دیہات میں اس مدت کے دوران تعلیم کی سہولتوں میں ریکارڈ 25.88 فیصد اضافہ ہوا۔

نصابی کتب 8.99 فیصد مہنگی ہوئیں۔گاوں اور شہروں میں بھی تعلیمی سہولتیں 7.96 فیصد مہنگی ہوئیں۔ شہروں میں اس مدت کے دوران کتابیں 4.64 اور اسٹیشنری 7.86 فیصد مہنگی ہوئیں۔مہنگائی کی ماری عوام نے ارباب اختیار سے استدعا کی ہے کہ وہ اشرافیہ اور حکمران طبقے کی مراعات کو کم کرتے ہوئے عوام کو زندگی کی بنیادی سہولیات مہیا کرنے کے لیے کردار ادا کریں۔