پشاور شہر میں تجاوزات مافیا کیخلاف کارروائیاں جاری، مزید 66 افراد گرفتار

جمعرات 10 اپریل 2025 10:00

پشاور (اُردو پوائنٹ اخبارتازہ ترین - اے پی پی۔ 10 اپریل2025ء) سٹی ٹریفک پولیس پشاور نے تجاوزات مافیا کیخلاف کارروائیوں میں 66 افراد گرفتار کرکے مجسٹریٹ کے سامنے پیش کیا جن پر جرمانے عائد کئے جبکہ نو پارکنگ زون کی خلاف ورزیوں پر 70 موٹر سائیکل مالکان کے خلاف کارروائی کی ہے۔ سٹی ٹریفک پولیس پشاور کی جانب سے تجاوزات مافیا کو رضا کارانہ طور پر تجاوزات ختم کرنے اور نو پارکنگ زون کی خلاف ورزی نہ کرنے بارے آگاہی کا سلسلہ جاری ہے جبکہ اس سلسلے میں خلاف ورزی کرنیوالوں کے خلاف شہر کے تمام سیکٹروں میں کارروائیاں کی گئی ہیں جس کے تحت تجاوزات قائم کرنے پر 66 افراد کو گرفتار کرکے مجسٹریٹ کے سامنے پیش کیا جن پر جرمانے عائد کئے گئے۔

اسی طرح خوشحال بازار سرکی گیٹ اور نمک منڈی میں نو پارکنگ زون میں موٹر سائیکلیں کھڑی کرنے پر 70 موٹر سائیکل مالکان کے خلاف کارروائی کی گئی ہے۔

(جاری ہے)

چیف ٹریفک آفیسر ہارون رشید خان نے کہا ہے کہ تجاوزات قائم کرنے کے مرتکب افراد کے خلاف سخت سے سخت قانونی کارروائی عمل میں لائی جائے گی اور کسی کے ساتھ کوئی نرمی نہیں برتی جائے گی۔انہوں نے کہا کہ شہری نو پارکنگ زون کی خلاف ورزی نہ کریں ۔ انہوں نے ٹریفک حکام کو ہدایت کی کہ وہ ٹریفک قوانین کی خلاف ورزی کرنے والوں کے خلاف قانون کے مطابق سخت کارروائی کریں ۔