سعودی عرب کے 4 ایئرپورٹس کے لیے سکائی ٹریکس ایوارڈز

جمعہ 11 اپریل 2025 09:10

ریاض (اُردو پوائنٹ اخبارتازہ ترین - اے پی پی۔ 11 اپریل2025ء) سعودی عرب کے 4 ایئرپورٹس نے سکائی ٹریکس کی عالمی درجہ بندی 2025 میں نمایاں کامیابیاں حاصل کی ہیں۔اخبار 24 کے مطابق ایئرپوٹ ہولڈنگ (مطارات القابضہ)کی جانب سے جاری رپورٹ میں کہا گیا ہے کہ مملکت کے کے 4 ایئرپورٹس ریاض کا کنگ خالد انٹرنیشنل ایئرپورٹ، جدہ کا کنگ عبدالعزیز انٹرنیشنل ایئرپورٹ، مدینہ منورہ کا امیر محمد بن عبدالعزیز انٹرنیشنل ایئرپورٹ اور دمام کا شاہ فہد انٹرنیشنل ایئرپورٹ نے سکائی ٹریکس کی عالمی درجہ بندی 2025 میں نمایاں کامیابیاں حاصل کی ہے ۔

ایئرپورٹ ہولڈنگ کا کہنا ہے کہ ریاض کا کنگ خالد انٹرنیشنل ایئرپورٹ دنیا کے 100 بہترین ہوائی اڈوں کی فہرست میں عالمی سطح پر 24 ویں نمبر پر آیا ہے اور مشرق وسطی میں ’بہترین ہوائی اڈے کے عملے‘ کا ایوارڈ بھی اسی ایئرپورٹ کے نام ہے۔

(جاری ہے)

اس کے علاوہ یہ بہترین نئے ٹرمینل کے طورپر عالمی سطح پر تیسرے نمبر پر آیا ہے جبکہ سالانہ 30 سے 40 ملین مسافروں کے زمرے میں چوتھے نمبر پر آیا ہے اور مشرق وسطی کے ’بہترین ہوائی اڈے‘ کا اعزاز بھی اپنے نام کیا ہے۔

جدہ کا کنگ عبدالعزیز انٹرنیشنل ایئرپورٹ عالمی سطح پر 44 ویں نمبر پر آیا ہے اور اس نے ’فور سٹار‘ ریٹنگ حاصل کرکے مشرق وسطی کے بہترین ہوائی اڈوں کی فہرست میں پانچویں نمبر پر آگیا ہے۔مدینہ منورہ کا امیر محمد بن عبدالعزیز انٹرنیشنل ایئرپورٹ نے ’مشرق وسطی کے بہترین علاقائی ہوائی اڈے کا ایوارڈ‘ حاصل کیا ہے جبکہ علاقائی ایئرپورٹ میں ساتواں نمبر حاصل کیا ہے جبکہ عالمی سطح پر اس کا نمبر 50 واں ہے۔

دمام کا شاہ فہد انٹرنیشنل ایئرپورٹ بہترین علاقائی ہوائی اڈے کے طور پر دوسرے اور مشرق وسطی کے بہترین ہوائی اڈوں میں 8 ویں نمبر پر رہا۔ اسی طرح عالمی سطح پر اس کا نمبر 57 واں رہا۔سکائی ٹریکس دنیا بھر کے لاکھوں مسافروں کی رائے کی بنیاد پر ان ہوائی اڈوں اور ایئرلائنز کا جائزہ لینے میں مہارت رکھنے والے معروف اداروں میں سے ایک ہے۔