ضروری اشیاء کی قیمتوں میں ہفتہ واربنیادوں پر0.83فیصد،سالانہ بنیادوں پر2.81فیصدکی کمی ریکارڈ

جمعہ 11 اپریل 2025 17:02

اسلام آباد (اُردو پوائنٹ اخبارتازہ ترین - اے پی پی۔ 11 اپریل2025ء) ملک میں ضروری اشیاء کی قیمتوں میں ہفتہ واربنیادوں پر0.83فیصد اور سالانہ بنیادوں پر2.81فیصدکی کمی ریکارڈکی گئی ہے۔پاکستان بیورو برائے شماریات کی جانب سے قیمتوں کے حساس اشاریہ بارے ہفتہ واررپورٹ کے مطابق 10اپریل کوختم ہونے والے ہفتہ میں صارفین کیلئے قیمتوں کاحساس اشاریہ 317.12پوائنٹس ریکارڈ کیا گیا جو پیوستہ ہفتہ میں 319.79پوائنٹس تھا۔

گزشتہ ہفتہ کے دوران روزمرہ استعمال کی 11اشیاء کی قیمتوں میں کمی اور 26کی قیمتوں میں استحکام رہا ۔ اس کے برعکس 14اشیاء کی قیمتوں میں اضافہ ہوا۔ہفتہ رفتہ میں لہسن کی قیمت میں 14.73فیصد،ٹماٹر12.82فیصد،پیاز11.40فیصد،چکن 8.05فیصد،انڈے 7.40فیصد،کیلا6.72فیصد،آٹا 4.74فیصد اورآلو کی قیمت میں 2.33فیصدکی کمی ہوئی،اس کے برعکس دال چناکی قیمت میں 1.63فیصد،ایل پی جی 0.64فیصد،بیف 0.59فیصد،دہی 0.59فیصد،گڑ0.46فیصد،دال مونگ 0.35فیصد، پاوڈرنمک 0.26فیصد، مٹن 0.20فیصد اورسگریٹس کی قیمت میں 0.06فیصدکااضافہ ہوا۔

(جاری ہے)

سب سے کم یعنی 17732روپے ماہوارآمدنی رکھنے والے گروپ کیلئے قیمتوں کے حساس اشاریہ میں 0.98فیصدکی کمی ہوئی۔ 17733روپے سے لیکر22888روپے، 22889روپے سے لیکر29517روپے، 29518روپے سے لیکر44175اوراس سے زیادہ آمدنی رکھنے والے گروپوں کیلئے قیمتوں کے حساس اشاریہ میں بالترتیب 0.99فیصد،0.91فیصد،0.92فیصد اور0.75فیصدکی کمی ہوئی ہے۔صارفین کیلئے قیمتوں کے حساس اشاریہ کاتعین ملک کے 17بڑے شہروں کی 50مارکیٹوں میں 51ضروری اشیاء کی قیمتوں میں کمی بیشی کی بنیادپرکیاجاتاہے۔