Live Updates

خیبرپختونخوا مائنز اینڈ منرلز بل میں صوبائی وسائل کسی وفاقی ادارے کو منتقل کرنے کی کوئی شق شامل نہیں گئی

بل کو بانی سے تفصیلی مشاورت کے بعد ہی اسمبلی سے منظور کروایا جائیگا، اس بل پر کسی قسم کی جلد بازی نہ کی گئی تھی نہ کی جا رہی ہے اور نہ کی جائیگی۔ پی ٹی آئی سیاسی کمیٹی کا اعلامیہ

ثنااللہ ناگرہ جمعہ 11 اپریل 2025 20:11

خیبرپختونخوا مائنز اینڈ منرلز بل میں صوبائی وسائل کسی وفاقی ادارے ..

اسلام آباد ( اردوپوائنٹ اخبار تازہ ترین۔ آئی پی اے ۔ 11 اپریل 2025ء ) پی ٹی آئی سیاسی کمیٹی کے اعلامیہ میں کہا گیا ہے کہ خیبرپختونخوا مائنز اینڈ منرلز بل میں صوبائی وسائل کسی وفاقی ادارے کو منتقل کرنے کی کوئی شق شامل نہیں گئی ، بل کو بانی سے تفصیلی مشاورت کے بعد ہی اسمبلی سے منظور کروایا جائیگا۔ پی ٹی آئی ایکس پر جاری تحریک انصاف کی سیاسی کمیٹی کے اعلامیہ کے مطابق خیبر پختونخوا اسمبلی میں زیر بحث مائنز اینڈ منرلز بل پر تحریک انصاف کی سیاسی کمیٹی کا تفصیلی اجلاس ہوا، جس میں وزیراعلیٰ علی امین گنڈاپور نے بل کے تمام اہم نقاط پہ جامع اور مفصل وضاحت پیش کی۔

کمیٹی نے اس بل کے تمام پہلوؤں کا جائزہ لیا اور متفقہ طور پر طے پایا کہ بل میں صوبائی خودمختاری، حقوق و معدنی وسائل وفاق، SIFC یا کسی بھی وفاقی ادارے کو منتقل کرنے کی کوئی شق شامل نہیں ہے۔

(جاری ہے)

تمام سٹیک ہولڈرز کی مثبت تجاویز کو خوش آمدید کہا جائے گا۔ بل کی منظوری سے قبل دیگر پارلیمانی جماعتوں سے مشاورت جاری رہے گی۔ خیبر پختونخوا اسمبلی میں بل پیش کیا جا چکا ہے اور اس پہ بحث جاری ہے لیکن یہ بل عمران خان کے ایجنڈے، منشور، بیانیے اور عوامی امنگوں کے عین مطابق ہوگا۔

بل کی منظوری قائد عمران خان سے تفصیلی مشاورت، باقاعدہ اجازت اور اعتماد میں لینے بعد کے بعد ہی اسمبلی سے منظور کروایا جائیگا۔ اس بل پر کسی قسم کی جلد بازی نہ کی گئی تھی نہ کی جا رہی ہے اور نہ کی جائیگی۔ عمران خان کی جانب سے 8 اپریل کی ملاقات کی ہدایات سے متعلق چیئرمین سے ملاقات کرنے والے افراد ملاقات کی تفصیلات یا ہدایات پر میڈیا سے بات چیت کرنے سے سختی سے منع کیا۔

بانی عمران خان کی حکم کے مطابق ان سے ملاقات کرنے والی شخصیات انکی ہدایات تحریری طور پہ پارٹی کے مرکزی سیکرٹری اطلاعات کو دینگے اور وہ تحریری ہدایات و بیانات صرف اور صرف مرکزی سیکرٹری اطلاعات ہی جاری کرنے کا مجاز ہوگا انکے علاوہ کسی بھی بیان کو مصدقہ نہیں سمجھا جائیگا۔ پارٹی عہدیدار ایک دوسرے کے خلاف بیان بازی سے گریز کریں، خلاف ورزی پر شوکاز نوٹس جاری ہوگا۔ خلاف ورزی کرنے والے پہ جن کے پاس پارٹی کے عہدے ہیں ان سے ذمہ داریاں واپس لے لی جائیں گی۔ بیرسٹر گوہر کو پنجاب کے چیف آرگنائزر کے اختیارات سے متعلق آگاہی دی گئی۔ چیف آرگنائزر کے ساتھ 6 رکنی مشاورتی کمیٹی تشکیل دینے کی ہدایت دی گئی۔