مائنز اینڈ منرل ایکٹ پر بریفنگ کے دوران ہنگامہ آرائی، پی ٹی آئی ،اے این پی کے اراکین میں تلخ کلامی، سپیکر برہم

کسی کو سیاسی سکورنگ کیلئے بحث میں شریک نہیں کیا گیا، بل سیر حاصل بحث کے بعد کمیٹی میں بھیجا جا سکتا ہے، بابر سلیم سواتی ْماضی میں بھی وفاقی سطح پر متعدد بلز صوبے نے منظور کیے ،اس پر کسی قسم کا سمجھوتہ نہیں کیا جائے گا،بل کی ہر شق کا تقابلی جائزہ لیا جائے گا ،ضرورت پڑی تو بل کو سٹینڈنگ کمیٹی کے حوالے کیا جائیگا،سپیکر خیبرپختونخوا اسمبلی

پیر 14 اپریل 2025 21:50

پشاور (اُردو پوائنٹ اخبارتازہ ترین - این این آئی۔ 14 اپریل2025ء)خیبرپختونخوا اسمبلی اجلاس میں مائنز اینڈ منرل ایکٹ ترامیمی بل پر بریفنگ ہنگامہ آرائی کا شکار ہوگئی۔ ذرائع کے مطابق اے این پی کے رکن اسمبلی نثار باز کے اعتراض پر پی ٹی آئی کے اراکین نے جوابی موقف اختیار کیا جس سے ماحول کشیدہ ہو گیا۔ نثار باز نے بلوچستان میں بل کے حوالے سے کسی اعتراض کا نہ ہونے پر سوالات اٹھائے جس پر پی ٹی آئی اراکین برہم ہو گئے اور جوابی اعتراضات کیے۔

سپیکر خیبر پختونخوا اسمبلی بابر سلیم سواتی نے صورتحال پر برہمی کا اظہار کرتے ہوئے کہا کہ کسی کو سیاسی سکورنگ کیلئے بحث میں شریک نہیں کیا گیا، بل پر سیر حاصل بحث کی جائے گی اور اس کے بعد اسے کمیٹی میں بھیجا جا سکتا ہے۔اپوزیشن لیڈر اور دیگر اراکین نے نثار باز کو منانے کی کوشش کی اور ہنگامہ آرائی کے بعد اجلاس کی صورتحال کو معمول پر آگئی۔

(جاری ہے)

سپیکر بابر سلیم سواتی نے کہا کہ بل کو محکمہ پیٹرولیم نے تیار کر کے اسمبلی کو بھیجا ہے اور اس پر بحث کے بعد فیصلہ کیا جائے گا۔ سپیکر نے بتایا کہ ماضی میں بھی وفاقی سطح پر متعدد بلز صوبے نے منظور کیے ہیں اور اس پر کسی قسم کا سمجھوتہ نہیں کیا جائے گا۔انہوں نے اس بات کی وضاحت کی کہ بل کی ہر شق کا تقابلی جائزہ لیا جائے گا اور اگر ضرورت پڑی تو اس بل کو سٹینڈنگ کمیٹی کے حوالے کیا جائے گا۔ انہوں نے کہا کہ یہ بحث تین سے چار دن تک بھی جاری رہ سکتی ہے، اور جو اراکین اعتراض کریں گے انہیں اس پر تفصیل پیش کرنے کا موقع دیا جائے گا۔