پشاور ہائیکورٹ کا علی امین گنڈاپور کو کسی بھی درج مقدمے میں گرفتار نہ کرنے کا حکم

جسٹس صاحبزادہ اسد اللہ اور جسٹس صلاح الدین نے وزیر اعلیٰ خیبرپختونخوا ہ کی حفاظتی ضمانت کی درخواست پر سماعت کی

فیصل علوی منگل 15 اپریل 2025 14:07

پشاور ہائیکورٹ کا علی امین گنڈاپور کو کسی بھی درج مقدمے میں گرفتار ..

پشاور(اردوپوائنٹ اخبار تازہ ترین۔15اپریل 2025)پشاور ہائیکورٹ نے وزیراعلیٰ خیبرپختونخواہ علی امین گنڈاپور کو کسی بھی درج مقدمے میں گرفتار نہ کرنے کا حکم دیتے ہوئے انہیں40 روزہ حفاظتی ضمانت بھی دیدی، پشاور ہائیکورٹ کے جسٹس صاحبزادہ اسد اللہ اور جسٹس صلاح الدین نے وزیر اعلیٰ خیبرپختونخوا ہ کی حفاظتی ضمانت کی درخواست پر سماعت کی،سماعت کے دوران وکیل درخواست گزار کا کہنا تھا کہ وزیر اعلیٰ خیبرپختونخواہ کی میٹنگ تھی اس لئے وہ آج عدالت میں پیش نہیں ہوئے۔

وکیل درخواست گزار نے کہا کہ 66 مختلف مقدمات وزیر اعلیٰ کے خلاف درج ہیں۔ عدالت نے کہا کہ جتنا وقت آپ مانگ رہے ہیں وہ ہم نہیں دے سکتے۔عدالت نے استفسار کیا کہ تمام کیسز کی رپورٹ آچکی ہے یا نہیں۔ وکیل نیب نے عدالت کو بتایا کہ نیب کی صرف ایک انکوائری وزیر اعلیٰ خیبرپختونخواہ کے خلاف چل رہی ہے۔

(جاری ہے)

بعدازاں عدالت نے وزیر اعلیٰ خیبرپختونخوا ہ علی امین گنڈاپور کوکسی بھی درج مقدمے میں گرفتار نہ کرنے کا حکم بھی دیتے ہوئے انہیں 40 روز تک حفاظتی ضمانت بھی دیدی۔

خیال رہے کہ چند روز قبل بھی ڈسٹرکٹ اینڈ سیشن کورٹس اسلام آباد نے شراب اور اسلحہ برآمدگی کیس میں وزیراعلی خیبرپختو انخواہ علی امین گنڈا پور کے وارنٹ گرفتاری برقرار رکھے تھے۔وزیر اعلیٰ خیبر پختونخوا ہ علی امین گنڈاپور کے خلاف شراب اور اسلحہ برآمدگی کیس کی سماعت جوڈیشل مجسٹریٹ مبشر حسن چشتی نے کی تھی۔دوران سماعت وکیل صفائی نے عدالت میںیہ موقف اختیار کیاتھا کہ علی امین گنڈا پور پشاور ہائی کورٹ سے ضمانت پر تھے۔ عدالت پہلے بریت کی درخواست سن لے اس کیلئے حاضری بھی ضروری نہیں تھی۔وکلاءکے دلائل سننے کے بعد بعدازاں عدالت نے کیس کی مزیدسماعت 26 اپریل تک ملتوی کردی تھی۔ علی امین گنڈاپور کے خلاف تھانہ بھارہ کہو میں مقدمہ درج کیا گیا تھا۔