بھارتی اداکار وجے نے وقف بل سپریم کورٹ میں چیلنج کر دیا

منگل 15 اپریل 2025 22:27

ممبئی (اُردو پوائنٹ اخبارتازہ ترین - این این آئی۔ 15 اپریل2025ء)تملگا ویٹری کالیگم کے صدر و اداکار وجے نے وقف بل 2025 کو سپریم کورٹ میں چیلنج کر دیا۔بھارتی میڈیا کے مطابق بھارتی سپریم کورٹ میں وقف بل منظور ہونے کے بعد سے اب تک کئی درخواستیں دائر کی گئی ہیں جن میں کہا گیا یے کہ یہ بل مسلم کمیونٹی کے ساتھ امتیازی سلوک اور ان کے بنیادی حقوق کی خلاف ورزی ہے۔

اب تک وقف بل کو سپریم کورٹ میں چیلنج کرنے والوں میں آل انڈیا مجلس اتحاد المسلمین کے رکن پارلیمنٹ اسد الدین اویسی، کانگریس ممبران پارلیمنٹ محمد جاوید، عمران پرتاپ گڑھی، عام آدمی پارٹی کے امانت اللہ خان اور آزاد سماج پارٹی کے سربراہ و ایم پی چندر شیکھر آزاد شامل ہیں۔ان کے علاوہ، سمبھل سے سماج وادی پارٹی کے رکنِ پارلیمنٹ ضیا الرحمن برق، صدر جمعی علما ہند مولانا ارشد مدنی، کیرالہ میں مقیم سنی علما کا ادارہ سمستھا کیرالہ جمعی العلما، سوشل ڈیموکریٹک پارٹی آف انڈیا، انڈین یونین مسلم لیگ اور این جی او ایسوسی ایشن فار پروٹیکشن آف سول رائٹس نے بھی وقف بل کو سپریم کورٹ میں چیلنج کیا ہے۔

(جاری ہے)

آل انڈیا مسلم پرسنل لا بورڈ نے بھی وقف بل کو سپریم کورٹ میں چیلنج کیا ہے۔بہار سے راشٹریہ جنتا دل کے ممبران منوج جھا، فیاض احمد اور محمد اظہار آصفی نے بھی وقف بل کو چیلنج کیا ہے۔انہوں نے عدالت میں دائردرخواست میں کہا ہے کہ یہ بل مسلم مذہبی اوقاف میں بڑے پیمانے پر حکومتی مداخلت کو سہولت فراہم کرتا ہے۔ دوسری جانب اب تملگا ویٹری کالیگم کے صدر و اداکار وجے نے بھی وقف بل 2025 کو سپریم کورٹ میں چیلنج کر دیا ہے ۔