vشیفیلڈ میں 9 اسکولوں کو حملے کی دھمکی، 17 سالہ نوجوان گرفتار

منگل 15 اپریل 2025 20:30

شیفیلڈ(اُردو پوائنٹ اخبارتازہ ترین - آن لائن۔ 15 اپریل2025ء)برطانوی شہر شیفیلڈ کے 9 اسکولوں کو دھمکی آمیز ای میلز بھیجنے کے الزام میں 17 سالہ نوجوان کو گرفتار کر لیا گیا۔ ساؤتھ یارکشائر پولیس کے مطابق پیر کی صبح 6 بج کر 38 منٹ پر اطلاع موصول ہوئی کہ شیفیلڈ کے مختلف اسکولوں کو آتشیں اسلحے سے حملے کی دھمکی آمیز ای میلز موصول ہوئی ہیں۔

(جاری ہے)

پولیس نے فوری طور پر معاملے کی سنگینی کو مدِنظر رکھتے ہوئے حفاظتی اقدامات کا آغاز کیا اور متعلقہ اسکولوں میں سیکیورٹی مزید سخت کر دی۔

ساؤتھ یارکشائر پولیس نے جاری کردہ بیان میں کہا ہے کہ ابتدائی تحقیقات کے مطابق یہ دھمکی حقیقی نہیں لگتی۔قانون نافذ کرنے والے اداروں نے 17 سالہ مشتبہ نوجوان کو بدنیتی پر مبنی مواصلات کے الزام میں گرفتار کر لیا ہے، جو اس وقت پولیس کی تحویل میں ہے۔ان کا کہنا ہے کہ احتیاطی تدابیر کے طور پر واقعے کی مکمل چھان بین جاری ہے۔