ویمنزکرکٹ ورلڈ کپ کوالیفائر میں کائنات امتیاز 10 ماہ کی بیٹی کے ساتھ کمنٹری میں مصروف

بدھ 16 اپریل 2025 22:33

لاہور (اُردو پوائنٹ اخبارتازہ ترین - این این آئی۔ 16 اپریل2025ء) آئی سی سی ویمنز کرکٹ ورلڈکپ کوالیفائر میں سابق ویمن کرکٹر کائنات امتیاز 10ماہ کی بیٹی کے ساتھ کمنٹری میں مصروف ہیں۔کائنات امتیاز نے 19ون ڈے اور 21ٹی ٹونٹی میچز میں پاکستان کی نمائندگی کی ہے۔ لاہور میں نجی ٹی وی سے گفتگو کرتے ہو ئے کائنات امتیاز نے کہا کہ بیٹی کے ہمراہ مشکل ضرور ہورہی ہے لیکن سب ممکن بھی ہے کیونکہ ہمارے پاس کئی ایک مثالیں ہیں، کرکٹر بسمہ معروف بیٹی کے ساتھ 2سال کرکٹ کھیلتی رہی ہیں اور میں اب کمنٹری کررہی ہوں۔

انہوں نے کہا کہ 10ماہ کی بیٹی ہے، روئے گی تو سہی لیکن اس کے والد ساتھ موجود ہوتے ہیں، میری فیملی سپورٹ بہت مضبوط ہے، شوہر بہت ساتھ دے رہے ہیں، آخر ان کی بھی بیٹی ہے، کبھی کبھار میری والدہ میرے ساتھ ہوتی ہیں، فیملی سپورٹ ہو تو کوئی بھی قربانی دی جا سکتی ہے اور کامیابی حاصل کی جا سکتی ہے۔

(جاری ہے)

کائنات امتیاز کا کہنا تھا کہ آئی سی سی ویمنز کرکٹ ورلڈ کپ کوالیفائر میں کمنٹری کر رہی ہوں اور میری والدہ امپائرنگ، اس سے اچھا کیا لمحہ ہوگا، میری والدہ نے اپنا کیرئیر بنانے کے لیے بہت محنت کی ہے، انہوں نے یہاں ون ڈے ڈیبیو کیا ہے، اس سے قبل انہوں نے ٹی ٹونٹی کرکٹ میں امپائرنگ ڈیبیو کیا وہ میرے لیے بڑی انسپائرنگ ہیں۔

انہوں نے مزید کہا کہ کرکٹ کے بعد کمنٹری نیا کیرئیر ہے، ابھی میں بہت کچھ سیکھ رہی ہوں، میں اور میری بیٹی دونوں جدو جہد کررہی ہیں لیکن میں کمنٹری کیرئیر سے بہت لطف اندوز ہو رہی ہوں۔