پنجاب کلچر فیسٹیول کی تقریبات کا آغاز، وزیراعلی مہمان خصوصی ہونگی‘ عظمی بخاری

تین روزہ پنجاب کلچر فیسٹیول میں عوام کی انٹری فری ہو گی ‘ وزیر اطلاعات پنجاب کا بیان

بدھ 16 اپریل 2025 22:35

ْلاہور(اُردو پوائنٹ اخبارتازہ ترین - این این آئی۔ 16 اپریل2025ء)وزیر اطلاعات پنجاب عظمی بخاری نے کہا ہے کہ پنجاب میں آج سے تین روزہ ’’پنجاب کلچر فیسٹیول‘‘کی تقریبات کا آغاز کیا جا رہا ہے جس کا مقصد پنجاب کی عظیم ثقافتی ورثے کو اجاگر کرنا اور عوام کو اپنی جڑوں سے جوڑنا ہے۔انہوں نے کہا کہ پنجاب کلچر فیسٹیول کی مرکزی تقریب الحمرا ء آرٹس کونسل لاہور میں منعقد ہو گی جہاں وزیراعلی پنجاب مریم نواز بطور مہمان خصوصی شریک ہوں گی اور شرکا ء سے خطاب کریں گی۔

تین روزہ تقریبات میں پنجاب کی روایتی موسیقی، رقص، دستکاری، فوڈ فیسٹیول اور دیگر ثقافتی سرگرمیاں شامل ہوں گی۔الحمرا ء آرٹس کونسل کو پنجاب کی ثقافت کے رنگوں میں رنگ دیا گیا ہے تاکہ شہری ایک مکمل ثقافتی ماحول سے لطف اندوز ہو سکیں۔

(جاری ہے)

وزیر اطلاعات عظمی بخاری نے مزید بتایا کہ پنجابی ثقافت کے تمام پہلوئوں کو عملی طور پر پیش کیا جائے گا تاکہ نوجوان نسل کو اپنی ثقافت سے روشناس کرایا جا سکے۔

اس ایونٹ کی خاص بات یہ ہے کہ عوام کے لیے داخلہ بالکل مفت ہوگا۔تقریبات میں شرکت کے خواہشمند افراد الحمرا کی ویب سائٹ یا فیس بک اور دیگر سوشل میڈیا پلیٹ فارمز کے ذریعے اپنی رجسٹریشن کروا سکتے ہیں۔پنجاب حکومت تمام شہریوں کو دعوت دیتی ہے کہ وہ اس تاریخی اور ثقافتی جشن میں بھرپور شرکت کریں اور پنجاب کے ثقافتی ورثے کا جشن منائیں۔