شمالی کوریا کی سب سے بڑے جنگی بحری جہاز کی تیاری، سیٹلائٹ تصاویر سے انکشاف

پیانگ یانگ (اُردو پوائنٹ اخبارتازہ ترین - این این آئی۔ 17 اپریل2025ء)شمالی کوریا اپنے مغربی ساحل پر واقع نامپو نیول شپ یارڈ میں ایک جدید اور اب تک کا سب سے بڑا ملکی ساختہ جنگی بحری جہاز تیار کر رہا ہے، جو ممکنہ طور پر کم جونگ ان کے موجودہ بحری بیڑے میں شامل کسی بھی جہاز سے دوگنا بڑا ہو سکتا ہے۔ غیرملکی خبررساں ادارے کے مطابق یہ انکشاف امریکہ کے ایک تھنک ٹینک سینٹر فار اسٹریٹجک اینڈ انٹرنیشنل اسٹڈیز کی تازہ رپورٹ میں کیا گیا ۔

رپورٹ میں 6 اپریل کو حاصل کردہ سیٹلائٹ تصاویر کے حوالے سے بتایا گیا ہے کہ یہ جہاز ایک فلوٹنگ ڈرائی ڈاک پر بنایا جا رہا ہے اور اس کی لمبائی تقریبا 140 میٹر (459 فٹ) ہے، جو شمالی کوریا کی تاریخ کا سب سے بڑا جنگی جہاز ہو سکتا ہے۔رپورٹ کے مطابق، یہ جنگی جہاز فٹنگ آٹ کے مرحلے میں ہے، یعنی وہ آخری مرحلہ جس کے بعد بحریہ کے حوالے کیا جاتا ہے۔

(جاری ہے)

تصاویر میں دیکھا گیا کہ جہاز ایک نئے مرمت شدہ قریبی کوے پر کھڑا ہے، جہاں دو بڑی کرینیں اور دیگر مواد بھی موجود ہیں۔

سی ایس آئی اے کے تجزیہ کاروں جوزف برمیوڈیز جونیئر اور جینیفر جن کے مطابق، جہاز کا سائز اور ساخت اس بات کی نشاندہی کرتی ہے کہ یہ وہی جہاز ہو سکتا ہے جس کا کم جونگ ان نے مارچ 2025 میں معائنہ کیا تھا۔اگر یہ جہاز واقعی ہیلی کاپٹر لے جانے کے قابل فریگیٹ (FFH) ہے، تو یہ 2023 میں شمالی کوریا کی جانب سے انٹرنیشنل میری ٹائم آرگنائزیشن (IMO) کو دی گئی دو ایف ایف ایچ جہازوں کی اطلاع میں شامل ہو سکتا ہے۔

اس جہاز میں جدید ورٹیکل میزائل لانچ سیلز اور فیزڈ-ارے ریڈار سسٹمز نصب ہونے کا امکان ہے، جو اسے زمین اور سمندر دونوں سے خطرات کا مقابلہ کرنے کے قابل بناتے ہیں۔اگرچہ امریکی بحریہ کے ارلے برک کلاس ڈسٹرائرز اور کونسٹیلیشن کلاس فریگیٹس اس سے کچھ بڑے ہیں، پھر بھی شمالی کوریا کا یہ جہاز بحری ٹیکنالوجی میں ایک بڑا قدم تصور کیا جا رہا ہے۔

سیٹلائٹ تصاویر کے مطابق، جہاز 120 میٹر کے فلوٹنگ ڈرائی ڈاک میں موجود ہے، جو اس منصوبے کی اہمیت اور وسعت کی علامت ہے۔شمالی کوریا کے سرکاری میڈیا نے 2024 کے اواخر میں ایک ویڈیو جاری کی تھی، جس میں کم جونگ ان کو ایک بڑے جنگی جہاز کا معائنہ کرتے ہوئے دکھایا گیا تھا۔ یہ نیا جہاز اس سے کافی مشابہت رکھتا ہے، اور اس میں جدید لانچ سسٹمز اور ریڈار انسٹالیشنز کی جھلک دیکھی گئی تھی۔

شمالی کوریا کی بحریہ اب بھی زیادہ تر سرد جنگ کے دور کے آبدوزوں، پیٹرول بوٹس اور تیز رفتار حملہ آور کشتیوں پر مشتمل ہے، جو تکنیکی طور پر جنوبی کوریا، جاپان اور امریکہ سے پیچھے ہیں۔ تاہم، ملک کی حکمت عملی غیر روایتی حربوں پر مبنی ہے جیسے کہ چھوٹی ڈیزل آبدوزوں، بارودی سرنگوں کی تنصیب اور اسپیشل فورسز کے مشن۔یہ نیا جہاز نہ صرف ٹیکنالوجی میں پیش رفت کی علامت ہے بلکہ شمالی کوریا کی بحری حکمت عملی میں تبدیلی کی طرف اشارہ بھی کرتا ہے۔

اگرچہ اس کی مکمل صلاحیتیں اور آپریشنل حالت ابھی واضح نہیں، مگر اس کی موجودگی ہی خطے کے بحری توازن کو متاثر کر سکتی ہے۔جیسا کہ کوریا کے جزیرہ نما میں کشیدگی بدستور جاری ہے، شمالی کوریا کی نئی بحری کوششیں اب بین الاقوامی توجہ کا مرکز بن چکی ہیں۔