غزہ ایک بڑے انسانی المیے کے سامنے کھڑا ہے،12امدادی تنظیموں کا انتباہ

جمعہ 18 اپریل 2025 15:19

رام اللہ (اُردو پوائنٹ اخبارتازہ ترین - این این آئی۔ 18 اپریل2025ء)غزہ میں انسانی بنیادوں پر امدادی سرگرمیاں کرنے سے روک دی گئی 12 تنظیموں نے خبردار کیا ہے کہ 2 مارچ سے غزہ میں خوراک، ادویات اور ایندھن سمیت ہر چیز کی مکمل ناکہ بندی کر دیے جانے کے بعد غزہ ایک اور بڑے انسانی المیے کے سامنے کھڑا ہے۔جرمن ریڈیوکے مطابق مشکل ترین حالات میں غزہ کے جنگ زدہ بیگھر فلسطینیوں کی مدد کرنے کی کوشش کرنے میں مصروف ان 12 امدادی تنظیموں نے اسرائیل سے مطالبہ کیا کہ انہیں ان کا کام کرنے دیا جائے۔

تاکہ غزہ میں کسی ایک اور بڑے انسانی المیے کو روکنے میں اپنا کردار ادا کرسکیں ۔دوسری جانب اسرائیل نے اس امر کا اعادہ کیا کہ وہ غزہ کے لوگوں کو ملنے والی انسانی بنیادوں پر امداد کو ہر صورت روکے رکھے گا۔

(جاری ہے)

اسرائیل کے مطابق صرف اسی ایک طریقے سے وہ حماس کو زیر دبائو لا سکتا ہے۔ تاکہ حماس اسرائیلی قیدیوں کو رہائی دینے پر مجبور ہو اور اسرائیل کے راستے سے ہٹ جائے۔

انسانی بنیادوں پر امداد کرنے والی 12 غیر سرکاری تنظیموں میں آکسفام اور سیو دی چلڈرن بھی شامل ہیں۔جنہوں نے اس سلسلے میں ایک مشترکہ بیان بھی جاری کیا ۔مشترکہ بیان میں کہا گیا ہے کہ غزہ کا رہنے والا ہر شہری اپنے زندگی کے بچانے کے لیے اس امداد پر انحصار کرتا ہے اور یہ امداد نہ ملنے کی صورت میں غزہ کے رہنے والوں کی زندگیاں خطرے میں ہوں گی۔

بیان میں یہ بھی کہا گیا ہے کہ جب سے اسرائیل نے غزہ کے لیے امداد فراہمی کا راستہ روکا ہے تو فلسطینیوں کے لیے بدترین صورتحال کا سامنا ہے جو ہماری نسل کے لوگوں کی ایک بہت بڑی ناکامی ہے۔فلسطینی و بین الاقوامی سطح پر کام کرنے والی 43 تنظیموں نے 18 مارچ سے دوبارہ شروع ہونے والی اسرائیلی جنگ کے بعد سے اپنی تمام خدمات کو مجبورا منقطع کر دیا ہے کہ اسرائیلی فوج بلاامتیاز غزہ میں متحرک اور غیر متحرک ہر چیز کو بمباری و فائرنگ سے نشانہ بنا رہی ہے۔ ان این جی اوز کے مطابق غزہ میں نقل و حرکت کرنا اور لوگوں تک پہنچنا انتہائی خطرناک عمل ہے۔