’جیسے کو تیسا‘، پاکستانی ویمنز ٹیم کے ورلڈ کپ میں کوالیفائی کرنے سے بھارت مشکل میں پھنس گیا

بھارت میزبان ہونے کے باوجود اپنا میچ نیوٹرل وینیو پر کھیلے گا

ذیشان مہتاب ہفتہ 19 اپریل 2025 15:20

’جیسے کو تیسا‘، پاکستانی ویمنز ٹیم کے ورلڈ کپ میں کوالیفائی کرنے سے ..

کراچی (اردو پوائنٹ تازہ ترین اخبار ۔ 19 اپریل 2025ء ) پاکستانی ویمنز ٹیم نے رواں سال شیڈول آئی سی سی ورلڈ کپ کے لیے کوالیفائی کر کے میزبان ملک بھارت کے لیے بڑی مشکل کھڑی کر دی ہے، بھارت میزبان ہونے کے باوجود اپنا میچ نیوٹرل وینیو پر کھیلے گا ، اس کو کہتے ہیں جیسے کو تیسا۔

پاکستان میں جاری آئی سی سی ورلڈ کپ کوالیفائنگ ٹورنامنٹ میں میزبان ملک نے لگاتار چار میچز جیت کر رواں سال ستمبر ،اکتوبر میں بھارت میں شیڈول ورلڈ کپ کے لیے کوالیفائی کر لیا ہے۔

گرین شرٹس ویمنز ٹیم کی اس کارکردگی نے جہاں پاکستانیوں کو خوشیاں بڑھا دی ہیں وہیں میزبان ملک بھارت کے لیے مشکل کھڑی کر دی ہے اور پاکستان نہ آنے کی ضد پر ہٹ دھرمی سے قائم رہنے والا اب اپنے ہی بچھائے جال میں پھنس چکا ہے۔

(جاری ہے)

رواں برس پاکستان میں ہونے والی چیمپئنز ٹرافی میں بھارت نے آنے سے انکار کیا اور اپنے میچز نیوٹرل وینیو پر کھیلنے کی ضد ڈال دی تاہم پاکستان کرکٹ بورڈ نے بھی آسانی سے ہار نہ مانی اور جب بھارتی ٹیم باز نہ آئی تو ایسا معاہدہ کیا جس کے تحت 2027ء تک جتنے بھی کثیر الملکی ٹورنامنٹ پاکستان اور بھارت میں ہوں گے۔

ان میں دونوں ٹیمیں ایک دوسرے کے ملک کے بجائے نیوٹرل وینیو پر اپنے اپنے میچز کھیلیں گی۔

اس معاہدے کے تحت بھارت نے آئی سی سی چیمپئنز ٹرافی کے اپنے تمام میچز بشمول سیمی فائنل اور فائنل دبئی میں کھیلے اور سازگار ماحول کی بدولت چیمپئن بھی بن گیا تاہم پاکستانی ویمنز ٹیم کے آئی سی سی ورلڈ کپ کے لیے کوالیفائی کرنے کے بعد بھارت اپنے ہی بچھائے جال میں پھنس چکا ہے اور اس معاہدے کے تحت پاکستان ٹیم میگا ایونٹ کے لیے بھارت نہیں جائے گی بلکہ اپنے تمام میچز نیوٹرل وینیو پر کھیلے گی، ان میں پاکستان اور بھارت کے درمیان ممکنہ میچ بھی شامل ہے۔