راولپنڈی میں قومی انسداد پولیو مہم 2025 کا باضابطہ افتتاح کر دیا گیا

ہفتہ 19 اپریل 2025 22:58

راولپنڈی (اُردو پوائنٹ اخبارتازہ ترین - اے پی پی۔ 19 اپریل2025ء) راولپنڈی میں قومی انسداد پولیو مہم (این آئی ڈی) اپریل 2025 کا باضابطہ افتتاح ڈپٹی کمشنر آفس راولپنڈی میں کیا گیا۔ تقریب میں ڈپٹی کمشنر راولپنڈی حسن وقار چیمہ،ڈپٹی کمشنراسلام آباد عرفان نواز میمن، ایڈیشنل ڈپٹی کمشنر ایسٹ محترمہ مہرین بلوچ، اور عالمی ادارہ صحت (WHO) کی ایریا کوآرڈینیٹر شمائلہ اکبر نے شرکت کی۔

افتتاحی تقریب کے بعد راولپنڈی اور اسلام آباد کی ضلعی انتظامیہ کے مابین بین الاضلاعی بارڈر کوآرڈینیشن اجلاس منعقد ہوا جس میں انسداد پولیو اقدامات پر بریفنگ دی گئی۔ اجلاس میں بتایا گیا کہ ایئرپورٹ پر موجود پوائنٹس ٹو ویکسی نیٹ (PTPs) اور موٹر وے ٹول پلازہ پر قائم ٹرانزٹ ٹیموں کو ضلعی راولپنڈی کے سپرد کر دیا گیا ہے۔

(جاری ہے)

مزید برآں مس شدہ اور مہمان بچوں کے باقاعدہ ڈیٹا کے تبادلے کے لیے گوگل لنک اور واٹس ایپ گروپ بنایا گیا ہے، جس میں بارڈرنگ یونین کونسلز کے یو سی ایم اوز اور ایس آئی اے ٹرانزٹ ٹیمیں شامل ہوں گی۔

آئی سی ایم کے دوران لو ریسک یونین کونسلز (LPUCs) پر مانیٹرنگ ٹیموں کی خاص توجہ دی جائے گی۔ تمام پولیو اسٹیشنز اب پروگرام ایریا امیونائزیشن (PEI) اور ایمرجنسی فیڈرل انیشی ایٹو (EFI) ایکشنز کے دائرہ کار میں آئیں گے۔ڈپٹی کمشنر اسلام آباد عرفان نواز میمن نے اس موقع پر کہا کہ ہم اس بات کو یقینی بنائیں گے کہ اسلام آباد میں ہر بچہ پولیو کے قطرے پئے، اس مقصد کے لیے تمام ادارے بھرپور تعاون کر رہے ہیں۔

ڈپٹی کمشنر راولپنڈی حسن وقار چیمہ نے کہا کہ راولپنڈی انتظامیہ پولیو کے خاتمے کے لیے پرعزم ہے اور اسلام آباد کے ساتھ اس مربوط حکمت عملی سے نتائج مزید بہتر ہوں گے۔یہ مہم بچوں کو عمر بھر کی معذوری سے بچانے کے لیے ایک اہم قدم ہے، دونوں اضلاع کی مشترکہ کوششیں اس قومی مشن میں کامیابی کی ضامن ہیں۔