پنجاب یونیورسٹی کے 12 اساتذہ کروڑوں روپے کے سکالرشپ لے کر بیرون ملک فرار ہوگئے

یونیورسٹی انتظامیہ کا رقم کی وصولی اور کاروائی کیلئے ایف آئی اے، وزارت خارجہ و داخلہ کو خط لکھنےکا فیصلہ، ان اساتذہ کو یونیورسٹی سروس سے بھی برخاست کر دیا گیا ہے

ثنااللہ ناگرہ ہفتہ 19 اپریل 2025 20:15

پنجاب یونیورسٹی کے 12 اساتذہ کروڑوں روپے کے سکالرشپ لے کر بیرون ملک ..

لاہور (اُردو پوائنٹ اخبارتازہ ترین۔ آئی پی اے۔ 19 اپریل 2025ء) پنجاب یونیورسٹی نے سکالرشپ پر بیرون ملک جا کر مفرور ہونے والے 12 اساتذہ سے رقوم کی ریکوری کے لئے ایف آئی اے کو خط لکھنے کا فیصلہ کیا ہے جبکہ مفرور اساتذہ کے شناختی کارڈ اور پاسپورٹ بلاک کرنے کے لئے پنجاب یونیورسٹی وزارت خارجہ اور وزارت داخلہ کو بھی خط لکھے گی۔ اپنے بیان میں پنجاب یونیورسٹی کے ترجمان کا کہنا ہے کہ پنجاب یونیورسٹی کے 56 اساتذہ کو بیرون ملک پی ایچ ڈی کرنے کے لئے کروڑوں روپے کی گرانٹ ملی تھی جن میں سے 12 اساتذہ نے جوائننگ نہ دی۔

7 اساتذہ ایچ ای سی کی سکالرشپ اور5 اساتذہ پنجاب یونیورسٹی کی اوورسیز سکالرشپ لے کر مفرورہوئے۔ انہوں نے کہا کہ قانون کے مطابق تمام اساتذہ کو بیرون ملک پی ایچ ڈی کرنے کے بعد وطن واپس آ کر 5 سال یونیورسٹی میں سروس دینا لازمی ہوتا ہے۔

(جاری ہے)

۔ انہوں نے کہا کہ ڈیوٹی جوائن نہ کرنے پر مفرور اساتذہ کو معاہدے کے مطابق یونیورسٹی کو کروڑوں روپے ادا کرنے تھے۔

ترجمان کے مطابق پنجاب یونیورسٹی سنٹر فار جیوگرافیکل انفارمیشن سسٹم کی فرح ستار 70لاکھ سے زائد، سنٹر فار جیوگرافیکل انفارمیشن سسٹم کے سید محسن علی 1کروڑ 40لاکھ سے زائد، انسٹیٹیوٹ آف ایڈمنسٹریٹو سائنسز کی کرن عائشہ ایک کروڑ سے زائد، شعبہ مائیکرو بائیولوجی اینڈ مالیکیولر جینیٹکس کی رابعہ عباس 90 لاکھ سے زائد، انسٹیٹیوٹ آف کوالٹی اینڈ ٹیکنالوجی مینجمنٹ کے خواجہ خرم خورشید 84 لاکھ سے زائد، ہیلی کالج آف کامرس کی شمائلہ اسحاق ایک کروڑ 61 لاکھ سے زائد اور سینٹر فار کول ٹیکنالوجی کے ڈاکٹر محمد عثمان رحیم 72لاکھ روپے سے زائد ادا کئے بغیر مفرور ہوگئے۔

انہوں نے کہا کہ کالج آف انجینئرنگ اینڈ ایمرجنگ ٹیکنالوجی سے سلمان عزیز 90 لاکھ سے زائد، انسٹیٹیوٹ آف ایڈمنسٹریٹو سائنس کی ڈاکٹر سیماب آراء فاروقی ایک کروڑ سے زائد، انسٹیٹیوٹ آف ایڈمنسٹریٹو سائنسز کی سامعہ محمود ایک کروڑ 16لاکھ سے زائد، سنٹر فار جیوگرافیکل انفارمیشن سسٹم محمد نواز 72لاکھ سے زائد اور پنجاب یونیورسٹی کالج آف انفارمیشن ٹیکنالوجی کی جویریہ اقبال 60 لاکھ روپے سے زائد ادا کئے بغیر مفرور ہوئے۔ انہوں نے کہا کہ پنجاب یونیورسٹی نے 12 مفرور اساتذہ کو یونیورسٹی سروس سے برخاست بھی کر دیا ہے۔