ڈی ڈبلیو 
اسلام آباد (اُردو پوائنٹ ۔ DW اردو۔ 20 اپریل 2025ء) پوپ فرانسس نے ایسٹر سنڈے کے مسیحی تہوار کے موقع پر سینٹ پیٹرز اسکوائر میں اجتماعی دعائیہ تقریب میں مختصر شرکت کی۔ انہیں جیسے ہی سینٹ پیٹرز باسیلیکا کی بالکونی میں لایا گیا وہاں موجود ہزاروں حاضرین میں خوشی کی لہر دوڑ گئی۔ پاپائے روم نے دھیمی آواز میں کہا "بھائیو اور بہنو، ایسٹر مبارک ہو!"
کیتھولک چرچ کے ہزاروں پیروکار ایسٹر سنڈے منانے کے لیے سینٹ پیٹرز اسکوائر میں جمع ہوتے ہیں۔
یہ اجتماع مسیحی کیلنڈر کا ایک خاص تہوار سمجھا جاتا ہے۔ ویٹیکن سٹی کے مطابق چونکہ پوپ فرانسس ڈبل نمونیا کے علاج کے بعد صحت یاب ہو رہے ہیں لہٰذا ان کی طرف سے ایسٹر عبادات کی قیادت ایک اعلیٰ درجہ کے کارڈینل کو سونپ دی گئیں۔(جاری ہے)
پوپ کی غزہ میں جنگ بندی کی اپیل
پاپائے روم کا ایسٹر کا پیغام ان کے ایک معاون نے پڑھ کر سنایا، جس میں پوپ نے کہا کہ غزہ کی صورت حال "ڈرامائی اور افسوسناک" ہے۔
پوپ نے فلسطینی عسکریت پسند گروپ حماس سے باقی یرغمالیوں کو رہا کرنے کا مطالبہ کیا۔ اس کے ساتھ ساتھ پوپ نے دنیا میں بڑھتے سامیت دشمنی کے رجحان کو "تشویشناک" قرار دیتے ہوئے، اس کی مذمت کی۔اپنے پیغام میں انہوں نے تمام اسرائیلی اور فلسطینی عوام کے 'مصائب سے اپنی قربت' کا اظہار کیا۔ پوپ فرانسس کے بقول، "میں متحارب فریقوں سے اپیل کرتا ہوں: جنگ بندی کا مطالبہ کریں، یرغمالیوں کو رہا کریں اور بھوک سے مرنے والے لوگوں کی مدد کے لیے آئیں جو امن کے مستقبل کے خواہشمند ہیں۔
"امریکی نائب صدر اور پوپ کی ملاقات
اس سال ایسٹر کا تہوار اور بھی اہمیت رکھتا ہے کیونکہ کیتھولک چرچ نے 2025 کو جوبلی یا مقدس سال قرار دیا ہے۔ ایک اندازے کے مطابق اس ہفتے کے آخر میں تقریباﹰ ایک ملین زائرین روم میں موجود ہیں۔
پوری دنیا کے ان مسیحی عقیدت مندوں میں امریکی نائب صدر جے ڈی وینس بھی شامل ہیں۔ انہوں نے اتوار کے روز پوپ فرانسس سے اس وقت مختصر ملاقات کی، جب وہ سینٹ پیٹر اسکوائر روانہ ہو رہے تھے۔
ویٹیکن کے بیان کے مطابق پوپ نے وینس سے ایسٹر کی نیک خواہشات کے تبادلے کے لیے نجی نوعیت کی چند منٹ کی بات چیت کی۔ جے ڈی وینس نے سن 2019 میں کیتھولک عقیدہ قبول کیا تھا اور وہ اس سال روم میں اپنے خاندان کے ساتھ ایسٹر کی تقریبات میں شرکت کر رہے ہیں۔پوپ کی طبعیت کیسی ہے؟
88 سالہ پوپ فرانسس کو ایک ماہ سے زیادہ عرصہ روم کے جیمیلی ہسپتال میں گزارنے کے بعد چار ہفتے قبل ہسپتال سے جانے کی اجازت ملی تھی۔
ڈاکٹروں کا کہنا ہے کہ انہیں مکمل صحت یاب ہونے کے لیے مزید وقت درکار ہے۔سانس لینے میں بہتری کے باوجود پوپ کی آواز کمزور ہے۔ وہ آکسیجن پہنچانے والی ناک کی نالی کے بغیر پچھلے ہفتے دو مرتبہ عوام میں سامنے آئے تھے۔ ہفتے کے روز پوپ فرانسس نے زائرین کو خوش آمدید کہنے کے لیے سینٹ پیٹرز میں ایک مختصر حاضری دی تھی۔
فرانسس، جو دنیا کے 1.4 بلین سے زیادہ کیتھولک مسیحی عقیدت مندوں کے رہنما ہیں، سن 2013 میں اپنے انتخاب کے بعد پہلی بار ہولی ویک کی زیادہ تر تقریبات میں شرکت سے محروم رہے ہیں۔
ادارت: رابعہ بگٹی
