Live Updates

بھارت کا بیانیہ عالمی سطح پر ناکام، دوست ملک ڈٹ کر پاکستان کے ساتھ کھڑے ہیں، وزیرخارجہ

دوست ممالک کو بھارت کے بے بنیاد الزامات سے آگاہ کیا اور کہا ہے کہ اس مرتبہ اینٹ کا جواب پتھرسے دیا جائے گا، چین اور ترکیہ نے بالکل واضح مؤقف اپنایا ہے؛ اسحاق ڈار کا سینیٹ اجلاس میں اظہارخیال

ساجد علی بدھ 30 اپریل 2025 11:44

بھارت کا بیانیہ عالمی سطح پر ناکام، دوست ملک ڈٹ کر پاکستان کے ساتھ کھڑے ..

اسلام آباد ( اُردو پوائنٹ اخبارتازہ ترین۔ 30 اپریل 2025ء ) ملک کے نائب وزیراعظم اور وزیر خارجہ اسحاق ڈار نے کہا ہے کہ بھارت کا بیانیہ عالمی سطح پربری طرح ناکام ہوگیا اور دوست ملک ڈٹ کر پاکستان کے ساتھ کھڑے ہیں۔ تفصیلات کے مطابق سینیٹ اجلاس میں اظہار خیال کرتے ہوئے انہوں نے کہا کہ سینیٹ نے بھارتی جارحیت کے خلاف بھرپور جواب دیا ہے، سب نے مفصل جواب دیا کیوں کہ قومی سلامتی کا مسئلہ آئے گا تو الحمد للہ ہم سب ایک ہیں، قومی سلامتی کا معاملہ آیا تو سب نے سیاست کو ایک طرف رکھ دیا۔

وزیر خارجہ نے کہا کہ پلوامہ واقعہ ہوا تو بھارت نے آرٹیکل 370 اے کو ختم کیا، اس بار بھی دوست ممالک کو بھارت کے بے بنیاد الزامات سے آگاہ کیا ہے، سعودی عرب، چین ، متحدہ عرب امارات، قطر، ترکیہ سے رابطہ کیا، آذربائیجان، برطانیہ، کویت، بحرین اور ہنگری کے وزرائے خارجہ سے بھی بات ہوئی، اس دوران قریبی دوست ممالک کو موجودہ صورتحال سے آگاہ کیا۔

(جاری ہے)

نائب وزیراعظم نے بتایا کہ اس معاملے پر چین اور ترکیہ نے بالکل واضح مؤقف اپنایا ہے، چینی وزیر خارجہ سے بات ہوئی انہوں نے واضح کہا ہم آپ کے ساتھ ہیں اور دوست ملک کے ناطے حمایت کی بھرپور یقین دہانی کرائی، اسی طرح ترکیہ کے وزیرخارجہ نے بھی بھرپور حمایت کا یقین دلایا، ترکیہ کے وزیرخارجہ نے کہا آپ بتائیں ہم آپ کیلئے کیا کرسکتے ہیں؟۔

اسحاق ڈار کہتے ہیں کہ دوست ممالک سے کہا ہے کہ اس مرتبہ اینٹ کا جواب پتھرسے دیا جائے گا، ہم خاموش نہیں بیٹھیں گے بلکہ بھرپور جواب دیں گے کیوں کہ پہلگام کے واقعے کا پاکستان سے کوئی لینا دینا نہیں، اس حوالے سے آئی ایس پی آر نے شواہد کے ساتھ بریفنگ دی ہے کہ بھارت کیا کر رہا ہے، ہم نہیں بھارت کے اپنے سیاستدان مودی سے استعفے کا مطالبہ کر رہے ہیں۔