بھارتی رافیل طیاروں کی اپنی فضائی حدود میں پٹرولنگ، پاکستان ائیرفورس کی نشاندہی کرنے پر بھارتی طیارے بوکھلاہٹ کا شکار ہو کر فرار ہوگئے

پاکستانی ائیر فورس کی بروقت اور مستعد کارروائی پرانڈین رافیل طیارے بھاگنے پر مجبور ہوئے، پاک فوج ہندوستان کی جارحیت کا منہ توڑ جواب دینے کیلئے ہمہ وقت تیار ہے، سیکورٹی ذرائع

فیصل علوی بدھ 30 اپریل 2025 11:39

بھارتی رافیل طیاروں کی اپنی فضائی حدود میں پٹرولنگ، پاکستان ائیرفورس ..

راولپنڈی(اردوپوائنٹ اخبار تازہ ترین۔30اپریل 2025) بھارتی فضائیہ کے 4رافیل طیاروں کی مقبوضہ کشمیر میں اپنی فضائی حدود میں پٹرولنگ،پاک فضائیہ کے طیاروں نے بھارتی فضائیہ کے طیاروں کی فورا نشاندہی کر لی،پاکستان ایئرفورس کے خوف کا شکار بھارتی رافیل طیارے بوکھلاہٹ کا شکار ہوکر فوراواپس فرار ہونے پر مجبور ہو گئے،سیکورٹی ذرائع کا کہنا ہے کہ بھارتی طیاروں کی 29اور30اپریل کی درمیانی شب بھارتی فضائیہ کے چار رافیل جنگی طیاروں نے مقبوضہ جموں و کشمیر کی فضائی حدود میں پٹرولنگ کی تاہم وہ اپنی جغرافیائی حدود کے اندر ہی رہے۔

پاکستان ائیر فورس کے طیاروں نے ہندوستانی ائیر فورس کے ان جنگی جہازوں کی فوراً نشان دہی کر لی جس کے بعد پاکستانی ائیر فورس کی بروقت اور مستعد کارروائی پرانڈین رافیل طیارے بوکھلاہٹ کا شکار ہو کر راہ فرار اختیار کر گئے۔

(جاری ہے)

سیکیورٹی ذرائع کے مطابق یہ پیش رفت بھارتی فضائیہ کی جانب سے اشتعال انگیز اور جارحانہ عزائم کی عکاسی کرتی ہے۔جیسے ہی بھارتی رافیل طیارے فضا میں متحرک ہوئے پاکستانی طیاروں کی تیز اور موثر کارروائی نے بھارتی طیاروں کو ہکا بکا کر دیا اور وہ بوکھلاہٹ میں اپنی فضائی حدود کے اندر واپس پلٹنے پر مجبور ہو گئے۔

پاک فضائیہ کی بروقت مستعد کارروائی پر بھارتی رافیل طیارے واپس چلے گئے۔سیکورٹی ذرائع کے مطابق پاک فوج ہندوستان کی جارحیت کا منہ توڑ جواب دینے کیلئے ہمہ وقت تیار ہے ۔سیکورٹی ذرائع کا مزید یہ بھی کہنا ہے کہ پاکستان کی فضائیہ نے نہ صرف دشمن کی ہر حرکت پر کڑی نظر رکھی بلکہ فوری حکمت عملی کے تحت اپنی فضائی برتری کا مظاہرہ بھی کیا۔سیکیورٹی ذرائع نے واضح پیغام دیتے ہوئے کہا پاکستانی افواج ہر قسم کی بھارتی جارحیت کا جواب دینے کیلئے مکمل طور پر تیار اور چوکس ہیں۔