دریائے سندھ پر نئے کینالوں کی تعمیر غیر قانونی ہے،راشدمحمود سومرو

سندھ کو 55 فیصد پانی کم دیا جارہا ہے سی سی آئی کا فی الفور اجلاس بلاکر پانی کا مسئلہ حل کیا جائے ،جنرل سیکرٹری جے یوآئی سندھ

اتوار 20 اپریل 2025 18:10

جیکب آباد(اُردو پوائنٹ اخبارتازہ ترین - این این آئی۔ 20 اپریل2025ء)جے یوآئی سندھ کے سیکریٹری جنرل راشد محمود سومرو نے جے یو آئی پاکستان کی مرکزی مجلس عمومی کے اجلاس میں خطاب کرتے ہوئے کہا ہے کہ دریائے سندھ پر نئے کینالوں کی تعمیر غیر قانونی ہے، مرکزی جماعت کی جانب سے دریائے سندھ کے پانی پر سندھ کے اصولی موقف کی حمایت پر خراج تحسین پیش کیا، راشد محمود سومرو نے جے یو آئی کے سربراہ مولانا فضل الرحمن کی صدارت میں منعقدہ جامعہ مدنیہ لاہور میں مرکزی اجلاس سے خطاب کرتے ہوئے ملک بھر سے آئے ہوئے ممبران کے سامنے اعداد اور شمار پر سندھ کے پانی کا تفصیلی مقدمہ پیش کیا، انہوں نے کہا سندھ کو 55 فیصد پانی کم دیا جارہا ہے سی سی آئی کا فی الفور اجلاس بلاکر پانی کا مسئلہ حل کیا جائے انہوں نے کہا کہ وفاق کہتا ہے کہ سیلاب کے پانی سے نئے کینالوں کو پانی فراہم کیا جائے گا لیکن گزشتہ 15 سالوں سے ملک میں کوئی سیلابی صورتحال نہیں آئی اس سے واضح ہے کہ ہمیشہ کی طرح سندھ کے حصہ کے پانی پر ڈاکہ ڈالا جائے گا ایس آئی ایف سی کے تحت زمینیں غیر مقامی لوگوں کو دی جارہی ہیں انہوں نے کہا کہ مسئلہ فلسطین پر جے یو آئی آواز بلند کرتی رہے گی ایسی پریس رلیز جے یو آئی سندھ کے پریس سیکریٹری ڈاکٹر اے جی انصاری نے جاری کی۔