میر واعظ عمر فاروق کا علامہ محمد اقبال کو 87ویں برسی پر خراج عقیدت،رام بن میں جانی و مالی نقصان پرافسوس کا اظہار

پیر 21 اپریل 2025 13:44

سرینگر (اُردو پوائنٹ اخبارتازہ ترین - اے پی پی۔ 21 اپریل2025ء) بھارت کے غیرقانونی زیر تسلط جموں وکشمیرمیں کل جماعتی حریت کانفرنس کے سینئر رہنما میر واعظ عمر فاروق نے شاعر مشرق علامہ محمد اقبال کو ان کی 87ویں برسی پر خراج عقیدت پیش کرتے ہوئے انہیں جدید مسلم دنیا کا عظیم مفکر اور بصیرت افروز رہنما قرار دیا ہے ۔کشمیرمیڈیاسروس کے مطابق میرواعظ نے سرینگر میں جاری پیغام میں کہا ہے کہ علامہ اقبال کا پیغام جو قرآن پاک کے فلسفیانہ جوہر سے گہرائی سے جڑا ہوا ہے، نہ صرف برصغیر کے لوگوں بلکہ پوری دنیا کے لیے باعث تقویت ہے۔

انہوں نے کہا کہ علامہ محمد اقبال کا فلسفہ اللہ پر اٹل ایمان اور خود شناسی پر مبنی ہے۔ایک ایسا تصور جو اندرونی مضبوطی، اخلاقی جرات اور روحانی بلندی کو تقویت پہنچاتا ہے۔

(جاری ہے)

میرواعظ نے کہا کہ علامہ محمد اقبال نے ہمدردی، محبت، رواداری اور عالمگیر انسانی اقدار کے نظریات پر مسلسل زور دیاہے۔ انہوں نے کہاکہ آج کے مشکل دور میں علامہ محمد اقبال کی تعلیمات پر غور و فکر کرنے خاص طور پر ان کی خود شناسی، سچائی سے لگن، انسانیت کی خدمت اور قدرت کوگہرائی سے سمجھنے اور اس پر عمل کرنے کی اشد ضرورت ہے۔

دریں اثنا میرواعظ عمر فاروق نے ضلع رام بن میں آسمانی بجلی گرنے سے ہونے والے جانی و مالی نقصان پرافسوس کا اظہار کیاہے۔ انہوں نے حکام پر زور دیا کہ وہ متاثرہ خاندانوں کی فوری امداد اور بحالی کو یقینی بنائیں۔ انہوں نے خطرات سے دوچار علاقوں میں رہنے والے لوگوں سے احتیاط برتنے اور ہدایات پر عمل کرنے کی اپیل کی۔انجمن شرعی شیعیان کے صدر آغا سید حسن الموسوی الصفوی نے بھی بیان میں رام بن میں آسامنی بجلی گرنے سے ہونے والے نقصان پر افسوس کا اظہار کیاہے۔