’’یہاں چھٹیاں منانے آتے ہیں‘‘، وریندر سہواگ غیرملکی کھلاڑیوں پر برس پڑے

یہ لوگ یہاں چھٹیاں منانے آتے ہیں، بس تھوڑا فن کرتے ہیں اور چلے جاتے ہیں: سابق بھارتی کرکٹر کی گفتگو

ذیشان مہتاب پیر 21 اپریل 2025 12:38

’’یہاں چھٹیاں منانے آتے ہیں‘‘، وریندر سہواگ غیرملکی کھلاڑیوں پر ..

نئی دہلی (اردو پوائنٹ تازہ ترین اخبار ۔ 21 اپریل 2025ء) بھارت کے سابق بیٹر وریندر سہواگ آئی پی ایل کے رواں سیزن میں برُی طرح ناکام ہونے والے دو نامور غیرملکی کھلاڑیوں پر برس پڑے۔

کرکٹ ویب سائٹ سے گفتگو کرتے ہوئے 46 سالہ وریندر سہواگ نے گلین میکسویل اور لیام لیونگسٹن کی بدترین کارکردگی پر انہیں سخت تنقید کا نشانہ بنایا۔

انہوں نے کہا کہ یہ لوگ یہاں چھٹیاں منانے آتے ہیں، بس تھوڑا فن کرتے ہیں اور چلے جاتے ہیں، ان میں ٹیم کے لیے لڑنے کی کوئی واضح خواہش نظر نہیں آتی۔

(جاری ہے)

گلین میکسویل جو اپنی دھواں دھار بلے بازی اور گیم چینجنگ کے لیے مشہور ہیں، اس بار کے ایڈیشن میں ان کی کارکردگی انتہائی شرمناک رہی ہے۔ آسٹریلوی آل راؤنڈر نے چھ میچوں میں صرف 41 رنز بنائے ہیں۔

دوسرے کھلاڑی انگلینڈ کے لیام لیونگسٹن جو کہ جارحانہ بیٹنگ کے ساتھ ساتھ پارٹ ٹائم اسپنر بھی ہیں، کوئی خاطر خواہ کارکردگی نہیں دکھا سکے۔ انہوں نے 7 میچوں میں صرف 87 رنز بنائے ہیں جس پر رائل چیلنجر بنگلور نے 8 کروڑ 75 لاکھ روپے خرچ کیے ہیں۔