خیبر پختونخوا کے وزیر ایکسائز اینڈ ٹیکسیشن خلیق الرحمان کی زیر صدارت محکمہ ایکسائز کاجائزہ اجلاس

nپشاور(اُردو پوائنٹ اخبارتازہ ترین - آن لائن۔ 21 اپریل2025ء) خیبر پختونخوا کے وزیر ایکسائز اینڈ ٹیکسیشن خلیق الرحمان کی زیر صدارت محکمہ ایکسائز اینڈ ٹیکسیشن کی ماہانہ وصولیوں اور کارکردگی کے بارے میں جائزہ اجلاس پشاور میں منعقد ہوا۔ جس میں سیکرٹری محکمہ ایکسائز سید فیاض علی شاہ، ڈائریکٹر جنرل عبدالحلیم خان،ڈائریکٹر ایڈمن شہریار قمر خٹک،ڈائریکٹر ساؤتھ ریجن انجینئر ڈاکٹر عید بادشاہ،ڈائریکٹر ہزارہ ریجن ارشاد اللہ آفریدی، ڈائریکٹر پشاور ریجن سید الآمین، ڈائریکٹر مردان ریجن صفیان حقانی، ڈائریکٹر ملاکنڈ ریجن فضل غفور،ڈائریکٹر رجسٹریشن جاوید خلجی اور ضلعی ایکسائز اینڈ ٹیکسیشن افسران نے شرکت کی۔

اجلاس میں رواں مالی سال 25-2024 کے نو ماہ یعنی جولائی تا مارچ کے محصولات کی ریکوری اور مقررہ اہداف تک پیش رفت کا جائزہ لیا گیا۔

(جاری ہے)

اس موقع پر وزیر ایکسائز کو تمام ضلعی ایکسائز دفاتر کے مقررہ اہداف اور محصولات کی وصولیوں کے بارے میں تفصیلی بریفنگ دی گئی اور محکمہ میں جاری مختلف انتظامی امور اور عوامی سہولیات کی فراہمی کے حوالے سے کی جانے والی اصلاحات سے بھی انہیں آگاہ کیا گیا۔

اجلاس میں اچھی کارکردگی کا مظاہرہ کرنے والے افسران کی کارکردگی کو سراہا تے ہوئے بتایا گیا کہ صوبائی وزیر ایکسائز کی سربراہی میںمحکمے کی پوری ٹیم نے اپنی محنت اور لگن کے باعث پچھلے سال کے مقابلے میں اس سال 1.9 بلین روپے کی اضافی ریکوری کی ہے جو کہ مجموعی طور پر 107 فیصد بنتی ہے۔ صوبائی وزیر نے اس عزم کا اعادہ کیا کہ انشاء اللہ آنے والے سالوں میں اس سے زیادہ لگن اور محنت کے ساتھ وصولیاں کر کے صوبے کی آمدن میں مزیداضافہ کیا جائے گا۔

وزیر ایکسائز نے مقررہ اہداف کے حصول کو یقینی بنانے اور محصولات کی ریکوری کیلئے کوششیں مزید تیز کرنے کے احکامات بھی جاری کئے اور کہا کہ صوبہ بھر میں بڑے ٹیکس نادھندان کے خلاف قانون کے مطابق خصوصی مہم کا آغاز کیا جائے اسی طرح ٹوکن ٹیکس نادہندگان اور غیر رجسٹرڈ گاڑیوں /موٹر سائیکلوں اور رکشوں کے خلاف کاروائیاں تیز کی جائیں۔انہوں نے مزید کہا کہ ریجنل ڈائریکٹرز ایکسائز اور ضلعی ایکسائز اینڈ ٹیکسیشن افسران محکمہ کی کارکردگی اور محاصل وصولی مزید بہتر بنانے کیلئے خصوصی اقدامات اٹھائیں اورعوام کو بھی ہر ممکن سہولت فراہم کی جائے اور کسی قسم شکایت کا موقع نا دیا جائے،صوبائی وزیر نے کہا کہ ڈسپلن کی خلاف ورزی اور ڈیوٹی میں غفلت کسی صورت برداشت نہیں کی جائیگی، خلاف ورزی کرنے والے افسران و اہلکاروں کے خلاف سخت تادیبی کاروائی عمل میں لائی جائیگی۔