پنجاب فرانزک سائنس ایجنسی پاکستان کی پہچان ہے اسے بدنام کرنے والوں کو کیفر کردار تک پہنچایا جائے گا، سیکرٹری داخلہ پنجاب نور الامین مینگل

پنجاب فرانزک سائنس ایجنسی عملے کی مبینہ غفلت کا معاملہ؛ سیکرٹری داخلہ پنجاب نے ہائی پاور فیکٹ فائنڈنگ کمیٹی تشکیل دے دی؛ 48 گھنٹوں میں رپورٹ طلب

منگل 22 اپریل 2025 20:10

لاہور (اُردو پوائنٹ اخبارتازہ ترین - آن لائن۔ 22 اپریل2025ء) سیکرٹری داخلہ پنجاب نور الامین مینگل نے پنجاب فرانزک سائنس ایجنسی عملے کی مبینہ غفلت کے معاملے کا نوٹس لے لیا۔ ترجمان محکمہ داخلہ پنجاب کے مطابق سیکرٹری داخلہ پنجاب نے معاملے کی انکوائری کیلئے ہائی پاور فیکٹ فائنڈنگ کمیٹی تشکیل دے دی ہے۔ سیکرٹری داخلہ نے فرانزک سائنس ایجنسی کے برخاست شدہ ملازم کی گرفتاری اور پسٹل کی مبینہ چوری کی انکوائری کا حکم دیا ہے۔

فیکٹ فائنڈنگ کمیٹی ایڈیشنل سیکرٹری انٹرنل سکیورٹی کی سربراہی میں کام کرے گی۔ کمیٹی ممبران میں پنجاب فرانزک سائنس ایجنسی کے ڈائریکٹر ایڈمن اور محکمہ داخلہ سیکشن آفیسر برائے خودمختار ادارہ جات شامل ہیں۔ فیکٹ فائنڈنگ کمیٹی 48 گھنٹوں میں تمام پہلوؤں سے انکوائری کر کے رپورٹ جمع کروائے گی۔

(جاری ہے)

اس دوران ایجنسی کے سابقہ ملازم و ملزم اور موجودہ ملازمین سے بھی انکوائری کی جائے گی۔

کمیٹی واقعہ کی حقیقت جان کر ذمہ داران کا تعین کرے گی۔ کمیٹی کے ٹرمز آف ریفرنس میں شامل ہے کہ مستقبل میں ایویڈنس کی حفاظت اور فول پروف سسٹم پر عملدرآمد بارے سفارشات بھی پیش کرے گی۔ سیکرٹری داخلہ پنجاب نور الامین مینگل نے اس موقع پر کہا کہ پنجاب فرانزک سائنس ایجنسی پاکستان کی پہچان ہے اسے بدنام کرنے والوں کو کیفر کردار تک پہنچایا جائے گا۔ انہوں نے کہا کہ حکومت پنجاب شفافیت اور میرٹ کی پالیسی پر عمل پیرا ہے۔