سندھ میں ہیٹ ویو ختم، پنجاب میں برقرار، متعلقہ اداروں کو الرٹ رہنے کی ہدایت

جنوبی پنجاب کے اضلاع بہاولپور،رحیم یار خان،ڈیرہ غازی خان اور ملتان میں ہیٹ ویو کی لہر شدید ہو سکتی ہے،محکمہ موسمیات

جمعرات 24 اپریل 2025 13:00

سندھ میں ہیٹ ویو ختم، پنجاب میں برقرار، متعلقہ اداروں کو الرٹ رہنے ..

کراچی، لاہور(اُردو پوائنٹ اخبارتازہ ترین - این این آئی۔ 24 اپریل2025ء)سندھ میں ہیٹ ویو کی صورتحال ختم ہو گئی جبکہ پنجاب میں گرمی کی لہر برقرار ہے جس کے پیش نظر مریم نواز شریف کی جانب سے متعلقہ اداروں کو الرٹ رہنے کی ہدایت کی گئی ہے۔محکمہ موسمیات کے مطابق شہر قائد میں سمندری ہوائیں جزوی بحال ہونے سے ہیٹ ویو کی صورتحال ختم ہو گئی، آج شام تک سمندری ہوائیں مکمل بحال ہونے کا امکان ہے، آج سے شہر کے درجہ حرارت میں کمی متوقع ہے۔

کراچی میں آج کم سے کم درجہ حرارت 25.5 ڈگری سینٹی گریڈ ریکارڈ ہوا، ہوا میں نمی کا تناسب 74 فیصد ریکارڈ کیا گیا، شہر میں اس وقت مطلع صاف تیز دھوپ کا راج ہے، موجودہ درجہ حرارت 32 ڈگری سینٹی گریڈ ہے۔محکمہ موسمیات کے مطابق کراچی میں جنوب مغرب کی سمت سے 10 کلو میٹر فی گھنٹہ کی رفتار سے ہوائیں چل رہی ہیں، آج زیادہ سے زیادہ درجہ حرارت 36 سے 38 ڈگری سینٹی گریڈ تک بڑھنے کا امکان ہے۔

(جاری ہے)

نمی کا تناسب بڑھنے سے محسوس کیا جانے والا درجہ حرارت معمول سے دو یا تین ڈگری زائد رہنے کی توقع ہے، آئندہ 24 گھنٹے کے دوران موسم گرم اور مرطوب رہنے کا امکان ہے۔دوسری جانب پی ڈی ایم اے کے مطابق پنجاب میں آج بھی ہیٹ ویو اور گرمی کی لہر برقرار رہے گی، اپریل کے اختتام تک درجہ حرارت 45 ڈگری سینٹی گریڈ تک جانے کا خدشہ ہے۔جنوبی پنجاب کے اضلاع بہاولپور،رحیم یار خان،ڈیرہ غازی خان اور ملتان میں ہیٹ ویو کی لہر شدید ہو سکتی ہے، گزشتہ روز بہاولنگر میں 44 ڈگری، رحیم یار خان، بھکر 42 جبکہ کوٹ ادو اور میں 41 ڈگری درجہ حرارت ریکارڈ کیا گیا۔

پی ڈی ایم اے کے مطابق ٹوبہ ٹیک سنگھ، سرگودھا، ساہیوال، اوکاڑہ، ملتان، منڈی بہاؤالدین، خانیوال، قصور، لیہ، جھنگ، حافظ آباد اور فیصل آباد میں 40 ڈگری تک درجہ حرارت ریکارڈ کیا گیا۔ڈی جی پی ڈی ایم اے کا کہنا ہے کہ وزیر اعلیٰ پنجاب کی ہدایات کے پیش نظر متعلقہ ادارے الرٹ رہیں، انہوں نے کہا کہ چولستان کے اضلاع میں صاف پانی کی فراہمی کو یقینی بنایا جا رہا ہے۔