ضلعی انتظامیہ کا انسداد تجاوزات آپریشن ، 36 دکانیں سیل، ، 10 ٹرک سامان 9 پھل فروش رکشے ضبط کر لئے

اتوار 27 اپریل 2025 18:00

لاہور (اُردو پوائنٹ اخبارتازہ ترین - اے پی پی۔ 27 اپریل2025ء) ضلعی انتظامیہ لاہور نے ڈپٹی کمشنر لاہور سید موسی رضا کی قیادت میں شہر بھر میں بڑے پیمانے پر انسداد تجاوزات آپریشن کیا جس کے دوران 36 دکانیں سیل ، 10 ٹرک سامان 9 پھل فروش رکشے ضبط کر لئے گئے۔

(جاری ہے)

ترجمان کے مطابق کارروائیاں بادامی باغ، شاہدرہ، چمن کالونی، جوہر ٹاون، ملتان روڈ، رائیونڈ روڈ کے علاوہ مانگا منڈی، سندر روڈ، رائیونڈ مین بازار، عبداللہ گل انٹرچینج، والٹن روڈ، علامہ اقبال روڈ، ٹاون شپ مارکیٹ، حاجی کیمپ، جی ٹی روڈ، ہربنس پورہ، اور رضوان گارڈن سمیت مختلف علاقوں میں کی گئیں۔

ڈپٹی کمشنرنے کہا کہ وزیر اعلی کے زیرو انکروچمنٹ وژن کو عملی جامہ پہنانے کے لیے تمام اقدامات جاری ہیں اور ضلع بھر میں انسداد تجاوزات کارروائیوں میں مزید بہتری لائی جائے گی۔ انہوں نے کہا کہ ضلعی انتظامیہ لاہور تجاوزات سے پاک شہر بنانے کے لیے پرعزم ہے۔ اس مہم کے تحت تمام اسسٹنٹ کمشنرز کی نگرانی میں کارروائیاں مسلسل جاری ہیں جس سے شہر نہ صرف خوبصورت ہو رہا ہے بلکہ شہری سہولیات میں بھی اضافہ ہوا ہے۔ ان کارروائیوں سے نہ صرف پیدل چلنے والوں کو سہولت ملی ہے بلکہ ٹریفک کے مسائل میں بھی نمایاں کمی آئی ہے۔