پاکستان کو ہاکی کی ترقی کیلئے اقدامات کرنے ہونگے ، ہاکی لیجنڈ فلورس بویلینڈر

اسلام آباد(اُردو پوائنٹ اخبارتازہ ترین - این این آئی۔ 28 اپریل2025ء) ہالینڈ کے ہاکی لیجنڈ فلورس جان بویلینڈر نے کہا ہے کہ پاکستان کو ہاکی کی ترقی کیلئے اقدامات کرنے ہونگے ، پاکستان ٹیم اسوقت بڑے انٹرنیشنل ٹورنامنٹس نہیں کھیل رہی، پاکستان اور ہالینڈ ہاکی سے جڑے ہوے ہیں۔ نصیر بندہ ہاکی اسٹیڈیم اسلام آباد میں خواجہ جنید ہاکی اکیڈمی میں نوجوان بچوں کو ہاکی ٹریننگ کے بعد پاکستان میں ہالینڈ کی سفیر ہینی فوکیل، وفاقی سیکرٹری بین الصوبائی رابطہ محی الدین وانی، ڈائریکٹر سپورٹس ایج ای سی جاوید میمن،اولمپین خواجہ جنید کے ہمراہ میڈیا سے گفتگو کرتے ہوے فلورس جان بویلینڈر نے کہا کہ پاکستان ہاکی کی ترقی کیلئے اقدامات کرنے ہونگے،بہترین ایتھلیٹس اور ٹیلنٹ پر فوکس کرنا چاہیے، ماضی کے مقابلے میں ہاکی اب ماڈرن ہوچکی ہے، جدید تکنیک بہت ضروری ہے۔

(جاری ہے)

انٹرنیشنل ہاکی میں پاکستان بہتر پرفارم کرسکتاہے، پاکستان آکر بہت خوشی ہوئی ہے، پاکستان اور ہالینڈ ہاکی سے جڑے ہوئے ہیں۔انہوںنے کہاکہ ہاکی صرف گیم نہیں زندگی بہتر بنانے کا ذریعہ ہے۔انہوں نے کہا کہ پلیئرز کیساتھ کوچز کی کوچنگ بہت ضروری ہے، ٹیلنٹ کیساتھ سکلز کو بہتربنانا ہوگا۔انہوںنے کہاکہ1994ورلڈ کپ فائنل میں پاکستان مدمقابل تھا، میرا پنالٹی سٹروک مس کرنے پر پاکستان ورلڈ کپ جیتا، پاکستان میں ہاکی کے حالات کا علم نہیں، یہاں معیار کم کیوں ہوا اس کی خامیاں دور ہونی چاہیے۔

وفاقی سیکرٹری بین الصوبائی رابطہ محی الدین وانی نے میڈیا سے گفتگو میں کہا کہ ہم ایجوکیشن اور سپورٹس کو اکٹھا کرنا چاہتے ہیں، دونوں ادارے جب اکھٹے ہونگے تو بہتر نتائج ملیں گے، گراس روٹ لیول پر کھیلوں کی بہتری کیلئے اقدامات کر رپے ہیں، ہاکی کی بہتری اور ترقی کیلئے اقدامات اٹھا رہے ہیں۔ پرائم منسٹر یوتھ پروگرام فار سپورٹس کے فوکل پرسن اولمپین خواجہ جنید نے کہا کہ پاکستان میں ہاکی کھیل کی ترقی کیلئے کام کررہے ہیں ، پرائم منسٹر یوتھ پروگرام اور ہالینڈ سفارتخانہ نے بھرپور سپورٹ کیا، ہم سپورٹس ڈپلومیسی کو آگے بڑھا رہے ہیں، بویلینڈر کی پاکستان آمد ہاکی کھیل کی بہتری کیلئے مثبت رہے گی۔