Live Updates

آئینی بنچ نے آڈیو لیکس کمیشن کی تشکیل کے خلاف درخواستیں غیر موثر ہونے پر نمٹا دیا

آڈیو لیکس کمیشن غیر فعال ہو چکا ہے جس کے بعد یہ کیس تو غیر موثر ہو چکا.جسٹس امین الدین خان

میاں محمد ندیم بدھ 30 اپریل 2025 15:29

آئینی بنچ نے آڈیو لیکس کمیشن کی تشکیل کے خلاف درخواستیں غیر موثر ہونے ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔30 اپریل ۔2025 )سپریم کورٹ آئینی بینچ کے سربراہ جسٹس امین الدین خان کی سربراہی میں قائم پانچ رکنی آئینی بینچ نے مبینہ آڈیو لیکس کی تحقیقات کے لیے تشکیل دیے گئے کمیشن کے خلاف دائر درخواستوں پر سماعت کی‘ جسٹس امین الدین خان نے ریمارکس دیئے کہ آڈیو لیکس کمیشن غیر فعال ہو چکا ہے جس کے بعد یہ کیس تو غیر موثر ہو چکا.

(جاری ہے)

جسٹس محمد علی مظہر نے کہا کہ آڈیو لیکس کمیشن کے سربراہ جسٹس قاضی فائز عیسی ریٹائرڈ ہو چکے ہیں جبکہ کمیشن کے دیگر دو ممبران اب سپریم کورٹ کے جج ہیں بدھ کے روز درخواست گزار اور سابق وزیراعظم عمران خان کے وکیل حامد خان عدالت میں پیش ہوئے انہوں نے موقف اختیار کیا کہ اٹارنی جنرل نے بتانا ہے کہ آڈیو لیکس پر نیا کمیشن بنایا جائے یا نہیں.

ایڈیشنل اٹارنی جنرل عامر رحمان نے جواب دیا کہ اٹارنی جنرل دوسرے آئینی بینچ میں مصروف ہیں جس پر جسٹس امین الدین خان نے استفسار کیا کہ صرف اتنا بتا دیں کہ وفاقی حکومت نے آڈیو لیکس پر کیا کرنا ہے؟ایڈیشنل اٹارنی جنرل نے عدالت سے کہا کہ انہیںہدایات لینے کے لیے وقت دیا جائے. جسٹس جمال مندو خیل نے ریمارکس دیئے کیا مذاق بنایا ہوا ہے آپ نے، کبھی آپ آجاتے ہیں کبھی اٹارنی جنرل، صرف ہاں یا نہ بتانا ہے کیا اٹارنی جنرل پیش نہیں ہوئے تو نہیں بتائیں گے؟ جسٹس محمد علی مظہر نے ریمارکس دیے کہ وفاقی حکومت کو نیا کمیشن بھی بنانا ہو تب بھی یہ کیس اب غیر موثر ہے عدالت نے مبینہ آڈیو لیکس کمیشن کی تشکیل کے خلاف درخواستوں کو غیر موثر ہونے کی بنیاد پر نمٹا دیا.