دینی مدارس ملک میں اسلامی تشخص کے محافظ اور دین حق کی اشاعت کے مضبوط قلعے ہیں، مولانا عبدالرحمن رفیق

پیر 28 اپریل 2025 19:35

کوئٹہ(اُردو پوائنٹ اخبارتازہ ترین - این این آئی۔ 28 اپریل2025ء)جمعیت علماء اسلام کے رہنما اور رکن مرکزی مجلس شوریٰ مولانا عبدالرحمن رفیق نے کہا ہے کہ دینی مدارس ملک میں اسلامی تشخص کے محافظ اور دین حق کی اشاعت کے مضبوط قلعے ہیں علماء کرام کی لازوال قربانیوں اور انتھک جدوجہد نے ہمیشہ مغربی قوتوں کی مذموم سازشوں کا مردانہ وار مقابلہ کیا اور دین اسلام کے چراغ کو روشن رکھا۔

ان خیالات کا اظہار انہوں نے مدرسہ عربیہ انوار صحابہ اسپینی روڈ کوئٹہ میں منعقدہ دستارِ فضیلت کانفرنس سے خطاب کرتے ہوئے کیا۔انہوں نے کہا کہ آج نوجوان نسل کو علماء اور مدارس سے دور کرنے کیلئے خوشنما نعروں اور گمراہ کن پروپیگنڈے کا سہارا لیا جا رہا ہے تاکہ نوجوانوں کو دین سے بیگانہ اور علماء و دیندار طبقے سے بدظن کیا جا سکے۔

(جاری ہے)

انہوں نے کہا کہ دینی مدارس، سیاست، خانقاہ، دعوت و تبلیغ اور میدانِ جہاد سمیت ہر محاذ پر علماء کرام نے امت کی رہنمائی کی ہے اور ان شاء اللہ آئندہ بھی کرتے رہیں گے۔

انہوں نے علماء کرام پر زور دیا کہ وہ کنارہ کشی ترک کر کے میدانِ عمل میں آئیں اور دینی قوتوں کے دست و بازو بنیں۔ انہوں نے مزید کہا کہ مدارسِ دینیہ ملک و ملت کے وقار کے ضامن ہیں اور ان کے تحفظ کے لیے کسی قربانی سے دریغ نہیں کیا جائے گا۔