پنجاب میں رابطہ سڑ کوں کی بحالی کاپروگرام کامیابی سے جاری ہے، وزیراعلیٰ پنجاب

پیر 28 اپریل 2025 21:20

لاہور (اُردو پوائنٹ اخبارتازہ ترین - اے پی پی۔ 28 اپریل2025ء) وزیراعلی مریم نواز کی زیرِ صدارت اجلاس میں سیکرٹری سی اینڈ ڈبلیو نے ہر ڈویژن اور ڈسٹرکٹ کے روڈ پراجیکٹ کے بارے میں تفصیلی بریفنگ دی۔ بریفنگ میں بتایا گیا کہ پنجاب میں رابطہ سڑ کوں کی بحالی کاپروگرام کامیابی سے جاری ہے،پروگرام کے تحت 12ہزار کلومیٹر سڑکوں کی تعمیر ومرمت اورر بحالی وتوسیع کی جارہی ہے۔

اگلے مالی سال میں انٹر ڈسٹرکٹ اور انٹر ویلج روڈ کی تعمیر و بحالی کی تجاویز طلب کر لی گئیں۔ وزیراعلیٰ نے عوام کی ضرورت اور استعمال کو مد نظر رکھتے ہوئے روڈز پراجیکٹ کی ترجیحات مقرر کرنے کی ہدایت کی ہے۔ اس موقع پر انہوں نے کہا کہ روڈ سائیڈ کو تجاوزات سے پاک کرنے کیلئے بائی لاز پر عملدرآمد یقینی بنایا جائے۔

(جاری ہے)

اجلاس کے شرکا کو بریفنگ میں بتایا گیا کہ460 سڑکوں کی تعمیر و توسیع اور بحالی کا کام تیزی سے جاری ہے۔

قائد اعظم انٹر چینج تا واہگہ باڈر روڈ کی تعمیر مکمل کر لی گئی ہے ڈرین اور وال کی تعمیر جاری ہے۔ ملتان وہاڑی دو رویہ روڈ پراجیکٹ کی ایکنک نے منظوری دے دی جبکہ ایڈیشنل کیرج وے کی تعمیر جاری ہے۔ مری میں سڑکوں کی تعمیر و بحالی کے تمام پراجیکٹ کو مکمل کر لیا گیا ہے۔ کرتار پور راہداری پراجیکٹ میں شکر گڑھ روڈ مکمل، مریدکے نارووال روڈ کی تعمیر جاری ہے۔

اجلاس میں سڑکوں کی عمومی چوڑائی12فٹ رکھنے کی تجویز پر اتفاق کیا گیا۔ شہروں اور دیہات میں یکساں طرز کی ٹف ٹائل لگانے کی ہدایت کی گئی۔ اجلاس میں لاہور رنگ روڈ سدرن لوپ ساڑھے 18 کلومیٹر روڈ پراجیکٹ کا جائزہ لیا گیا۔ لیہ بھکر کو موٹروے سے منسلک کرنے کے لئے ایکسپریس وے پراجیکٹ کے لئے فیزیبلٹی سٹڈی رپورٹ طلب کرلی گئی جبکہ کھاریاں راولپنڈی ایکسپریس روڈ پراجیکٹ پر غور کیا گیا۔