سی پی او کا شہریوں کو درپیش مسائل حل کرنے کیلئے کھلی کچہری کا انعقاد

پیر 28 اپریل 2025 21:40

راولپنڈی (اُردو پوائنٹ اخبارتازہ ترین - اے پی پی۔ 28 اپریل2025ء) محکمہ پولیس میں راولپنڈی کے شہریوں کو درپیش مسائل کو حل کرنے کے لئے سٹی پولیس آفیسر سید خالد ہمدانی کی سربراہی میں کھلی کچہری کا انعقاد کیا گیا ۔پیر کو سٹی سرکل میں منعقدہ کھلی کچہری میں چیف ٹریفک آفیسر ،ایس پی راول ڈویژن، ڈی ایس پی سٹی،ایس ایچ اوز سٹی سرکل، انجمن تاجران ،ممبرز امن کمیٹی سمیت شہریوں کی کثیر تعداد نے شرکت کی۔

سی پی او سید خالد ہمدانی نے شہریوں کے مسائل سنے اور ان کے حل کے لئے موقع پر احکامات جاری کئے۔

(جاری ہے)

سی پی او نے افسران کو ہدایت دیتے ہوئے کہا کہ مارک کردہ درخواستوں پر دئیے گئے ٹائم کے اندر قانونی کارروائی کو یقینی بنایا جائے۔ سی پی او سید خالد ہمدانی کا کہنا تھا کہ تھانوں میں شہریوں کے لئے بہترین سروس ڈیلیوری کو ہر صورت یقینی بنایا جائے، تھانہ پولیسنگ کا بنیادی یونٹ ہے، تھانے کی سطح پر شہریوں کے مسائل کا حل اولین ترجیح ہے۔ انجمن تاجران اور ممبرز امن کمیٹی نے ناجائز تجاوزات کے حوالے سے راولپنڈی پولیس کی جانب سے کیے گئے اقدامات کو سراہا۔ وزیر اعلیٰ پنجاب کے وژن کے مطابق شہریوں کو انصاف کی فراہمی اور ان کے مسائل کے حل کے لیے تمام اقدامات اٹھائے جا رہے ہیں۔