کراچی،عزیز بھٹی پولیس کا طالب علم پر تشدد، رقم چھین لی، ڈکیت ظاہر کرنے کی دھمکی

دو لاکھ روپے بھی مانگے، کسی کو بتانے کی صورت میں جان سے مارنے کی دھمکی، ایس پی گلشن کا تحقیقات کا حکم

پیر 28 اپریل 2025 21:50

کراچی(اُردو پوائنٹ اخبارتازہ ترین - این این آئی۔ 28 اپریل2025ء)عزیز بھٹی پولیس نے طالب علم کو چیکنگ کے بہانے روک کر ڈکیت ظاہر کرنے کی کوشش کی، پانچ ہزار روپے اور قومی شناختی کارڈ بھی چھین لیا، ایس پی گلشن اقبال نے واقعے کی تحقیقات کا حکم دے دیا۔تفصیلات کے مطابق قانون کے رکھوالے ہی قانون کی دھجیاں اڑانے لگے، عزیز بھٹی تھانے کی حدود میں تعینات شاہین فورس کے اہل کاروں نے موٹر سائیکل سوار طالب علم کو چیکنگ کے بہانے روک کر نہ صرف تشدد کا نشانہ بنایا بلکہ طالب علم کو ڈکیت ظاہرکرنے کے بعد ہاتھ میں اسلحہ تھما کر اس کا موبائل فون سے جھوٹا بیان بھی ریکارڈ کرلیا۔

شاہین فورس کے اہل کار طالب علم پر گھناونے الزام بھی عائد کرتے ہوئے پولیس مقابلے میں جان سے مارنے کی دھمکیاں دیتے رہے۔

(جاری ہے)

شاہین فورس کے اہلکاروں نے طالب علم کے پاس موجود پانچ ہزار روپے اور قومی شناختی کارڈ بھی چھین لیا، طالب علم سے دو لاکھ روپے بھی منگوائے اور رقم نہ دینے کی صورت میں جان سے مارنے کی دھمکیاں بھی دیں۔موبائل فون پر طالب علم کے والد سے بات کرنے کے بعد طالب علم کو جانے کی اجازت دیتے ہوئے کہا کہ اگر کسی کو کچھ بتایا تو تمہیں چھوڑیں گے نہیں۔قائم مقام ایس پی گلشن اقبال نے شکایت موصول ہونے پر شاہین فورس کے دونوں اہل کاروں کو معطل کرکے ان کے خلاف انکوائری کا حکم دے دیا۔