Live Updates

پاکستان سپرلیگ 10 ‘ کل واحد میچ اسلام آباد یونائیٹڈ اورلاہورقلندرز کے مابین کھیلا جائے گا

ٹیمیں قذافی کرکٹ سٹیڈیم،لاہور میں مدمقابل ‘ میچ رات 8 بجے شروع ہو گا اور فلڈ لائٹس کی روشنی میں کھیلا جائے گا

منگل 29 اپریل 2025 12:02

پاکستان سپرلیگ 10 ‘ کل واحد میچ اسلام آباد یونائیٹڈ اورلاہورقلندرز ..

اسلام آباد(اُردو پوائنٹ اخبارتازہ ترین - این این آئی۔ 29 اپریل2025ء)پاکستان سپر لیگ 10 میں کل (بدھ کو) واحد میچ اسلام آباد یونائیٹڈ اور لاہور قلندرز کے مابین کھیلا جائے گا۔ پاکستان کرکٹ بورڈ(پی سی بی)کے زیر اہتمام پی ایس ایل کے دسویں ایڈیشن کے دلچسپ مقابلوں کا سلسلہ جاری ہے،جس میں شائقین کرکٹ کو انتہائی دلچسپ اور کانٹے دار مقابلے دیکھنے کو مل رہے ہیں۔

لیگ کے 19 ویں میچ میں بدھ کو اسلام آباد یونائیٹڈ اور لاہور قلندرز کی ٹیمیں قذافی کرکٹ سٹیڈیم،لاہور میں مدمقابل ہوں گی۔ میچ رات 8 بجے شروع ہو گا اور فلڈ لائٹس کی روشنی میں کھیلا جائے گا۔اسلام آباد یونائیٹڈ کو مایہ ناز آل رائونڈر شاداب خان لیڈ کر رہے ہیں اور دیگر نمایاں کھلاڑیوں میں میتھیوشارٹ،کولن منرو،راسی وین ڈیر ڈوسن،جیسن ہولڈر،حیدرعلی،سلمان آغا،عمادوسیم،حنین شاہ اور اعظم خان شامل ہیں۔

(جاری ہے)

اسلام آباد یونائیٹڈ کی ٹیم لیگ میں تاحال ناقابل شکست ہے اور 5 میچز کھیل کر پانچوں جیت چکی ہے اور وہ 10 پوائنٹس کے ساتھ پوائنٹس ٹیبل پر ٹاپ پوزیشن پر برقرار ہے۔لاہور قلندرز کو مایہ ناز فاسٹ بائولر شاہین شاہ آفریدی لیڈ کر رہے ہیں اور دیگر نمایاں کھلاڑیوں میں فخر زمان،حارث رئوف،ثام بلنگز،ٹام کیوران،کوسل پریرا،ڈیرل مچل،آصف علی اورسکندررضا شامل ہیں۔ لاہور قلندرز کی ٹیم 6پوائنٹس کے ساتھ پوائنٹس ٹیبل پر دوسرے نمبر پر ہے۔لاہور قلندرز نے 6 میچز کھیلے ہیں جن میں اس کو تین میچز میں فتح جبکہ تین میچز میں شکست کا سامنا کرنا پڑا تھا۔ ٹورنامنٹ کا فائنل 18 مئی کو قذافی سٹیڈیم، لاہور میں کھیلا جائے گا۔