Live Updates

وفاقی وزیر برائے ماحولیاتی تبدیلی کا جنیوا میں ہائی لیول مشاورتی اجلاس میں شرکت

بدھ 30 اپریل 2025 18:16

اسلام آباد (اُردو پوائنٹ اخبارتازہ ترین - این این آئی۔ 30 اپریل2025ء)وفاقی وزیر برائے ماحولیاتی تبدیلی، ڈاکٹر مصدق ملک نے جنیوا میں باسل، روٹرڈیم اور اسٹاک ہوم (BRS) کنونشنز کے کانفرنس آف پارٹیز (COP) کے موقع پر منعقدہ اقوام متحدہ کی کیپیٹل ڈیویلپمنٹ فنڈ (UNCDF) کے زیر اہتمام ہائی لیول مشاورتی اجلاس بعنوان ’’اونچے خطرات اور نظر انداز شدہ منڈیوں میں ترقی کے لیے سرمائے کو متحرک کرنا‘‘میں پاکستان کی نمائندگی کی۔

اجلاس سے خطاب کرتے ہوئے ڈاکٹر مصدق ملک نے ترقی پذیر اور موسمیاتی خطرات سے دوچار ممالک کے لیے مؤثر اور آسان مالی معاونت کی فوری ضرورت پر زور دیا۔ انہوں نے کہا کہ پاکستان ماحولیاتی لحاظ سے پائیدار ترقی، سبز معیشت اور قدرتی وسائل پر مبنی حل کو ترجیح دے رہا ہے۔

(جاری ہے)

انہوں نے کہاکہ پاکستان کا عالمی گرین ہاؤس گیسوں کے اخراج میں حصہ ایک فیصد سے بھی کم ہے مگر یہ دنیا کے سب سے زیادہ موسمیاتی تبدیلی سے متاثرہ ممالک میں شامل ہے۔

ایسی منڈیوں کے لیے ماحولیاتی مالی وسائل کو بروئے کار لانا انتہائی ضروری ہے تاکہ ہم پیرس معاہدے کے اہداف حاصل کر سکیں اور کمزور آبادیوں کا تحفظ کیا جا سکے۔ڈاکٹر مصدق ملک نے بین الاقوامی مالیاتی اداروں اور ترقیاتی شراکت داروں سے اپیل کی کہ وہ ماحولیاتی مالی معاونت تک رسائی کو آسان بنائیں، ماحولیاتی موافقت کی ٹیکنالوجیز میں سرمایہ کاری کریں، اور ترقی پذیر ممالک میں استعداد کار میں اضافے کے منصوبوں کی حمایت کریں۔

انہوں نے پاکستان کی نیشنل ڈٹرمینڈ کنٹریبیوشنز (NDCs) کے تحت مقرر کردہ اہداف، جیسے قابلِ تجدید توانائی کے فروغ، شجرکاری، اور پائیدار آبی وسائل کے انتظام کی مکمل وابستگی کا اعادہ کیا۔یہ اجلاس اقوام متحدہ کے اداروں، ترقیاتی مالیاتی اداروں، اور موسمیاتی لحاظ سے متاثرہ دیگر ممالک کے وزراء کی موجودگی میں منعقد ہوا، جس کا مقصد پائیدار ترقی کے لیے عوامی و نجی شعبوں سے مالی وسائل کو متحرک کرنے کے عملی فریم ورک کی تشکیل تھا۔