190 ملین پاؤنڈ کیس،بشریٰ بی بی کی سزا معطلی کی درخواست آئندہ ہفتے مقرر کرنے کی ہدایت

بدھ 30 اپریل 2025 19:45

اسلام آباد (اُردو پوائنٹ اخبارتازہ ترین - این این آئی۔ 30 اپریل2025ء)اسلام آباد ہائیکورٹ نے 190 ملین پاؤنڈ کیس میں بشریٰ بی بی کی سزا معطلی کی درخواست آئندہ ہفتے مقرر کرنے کی ہدایت کردی۔بیرسٹر سلمان صفدر نے بانی پی ٹی آئی کی سزا معطلی کی درخواست بھی مقرر کرنے کی استدعا کی۔اسلام آباد ہائیکورٹ کے قائم مقام چیف جسٹس سرفراز ڈوگر اور جسٹس محمد آصف نے 190 ملین پاؤنڈ کیس میں بانی پی ٹی آئی اور بشریٰ بی بی کی سزا کے خلاف اپیلوں پر سماعت کی۔

بانی پی ٹی آئی اور بشریٰ بی بی کے وکیل بیرسٹر سلمان صفدر نے روسٹرم پر آکر کہا کہ مرکزی اپیل مقرر کرنے کا میکنزم ہوتا ہے، بانی پی ٹی آئی اور بشریٰ بی بی کی اپیلیں پہلے بھی یہاں زیرِ سماعت ہیں، شکایت ہے جو آپ کے سامنے رکھنی ہے۔

(جاری ہے)

سلمان صفدر نے کہا کہ تیسری دفعہ بانی پی ٹی آئی اس کیس میں جیل گئے ہیں، دوسری دفعہ پھر نیب نے بانی پی ٹی آئی کو گرفتار کیا، تیسری دفعہ سزا کے بعد وہ جیل میں ہیں، آپ کے آفس سے متعلق شکوے کی بات ہے، ہماری سزا معطلی کی درخواستیں مقرر ہو جائیں۔

انہوں نے کہا کہ بانی پی ٹی آئی کی کوئی ترجیح نہیں ہے، وہ اپیل کیوں جلد سنی گئی کیونکہ رات گئے تک ٹرائلز ہوتے رہے، آپ کے پاس سزا معطلی کی ہماری درخواستیں پڑی ہوئی ہیں۔سلمان صفدر نے کہا کہ جو درخواستیں لگنی چاہئیں وہ لگ نہیں رہیں، جو اپیلیں نہیں لگنی چاہئیں وہ آفس لگا رہا ہے، الیکشن کمیشن کے فیصلے کے خلاف اپیلیں التوا میں ہیں، توشہ خانہ اپیلیں زیر التوا پڑی ہوئی ہیں، اب سمجھ آئی عدالت سے ہمیں ریلیف مل جاتا ہے، آفس ہے جو کیس لگا نہیں رہا۔سلمان صفدر نے کہا کہ بشریٰ بی بی کا اس کیس میں کردار بھی کوئی نہیں، 22 سال وکالت کی، مجھے اپنی ٹریننگ پر شک ہو جاتا ہے، رجسٹرار آفس نے بڑے عجیب اعتراض لگائے، ارجنٹ فارم نہیں لگائے۔